Türkmenabat şäherindäki 41-nji orta mekdebiň 6-njy synp okuwçysy Yhlas Narymanow Aktauda (Gazagystan) mekdep toparlarynyň arasynda geçen küşt boýunça dünýä çempionatynda şahsy bäsleşikde kümüş medal gazandy. Ol bu üstünlige öz mekdebiniň toparynda 12 ýaşdan uly bolmadyk derejede 2-nji tagtada oýnamak bilen ýetdi.
31-nji maýda 12 ýaşyny dolduran Yhlas Narymanow 87,5% «performans-reýting», ýagny ýerine ýetirijilik derejesini görkezmek bilen, diňe ukrainaly Stanislaw Pentskodan (93,8%) asgyn geldi. Pakistanly Asmi Aýat bürünç medala mynasyp boldy.
«Mekdep toparlarynyň arasyndaky ilkinji dünýä çempionaty Halkara küşt federasiýasynyň (FIDE) howandarlygynda iki ýaş derejesinde – 12 we 18 ýaşdan uly bolmadyk derejede ähli yklymyň 53 ýurdundan 350 töweregi mekdep okuwçysynyň gatnaşmagynda geçirildi. Aktau şäherine gelmek üçin paragwaýly, peruly we madagaskarly oýunçylar iň uzak ýoly geçmeli bolandyklaryny Türkmenistanyň Aktaudaky Baş konsullygy habar berýär.
Dört tagtanyň berilmegi göz öňünde tutulan dünýä çempionatynda Türkmenistanyň topary (U-12) üç oýunçy: Didar Baltaýew (1-nji tagta), Yhlas Narymanow (2-nji tagta) we Laçyn Açyldyýewa (3-nji tagta) bilen oýnamaly boldy. 4-nji oýunçy Aman Jumaýew käbir sebäplere görä çempionata gatnaşyp bilmedi. Ýöne, muňa garamazdan, Türkmenabat şäherindäki 41-nji orta mekdebiň topary mynasyp netije görkezdi – mümkin bolan 16 utukdan 9 utuk toplap, 27 toparyň arasynda 11-nji orny eýeledi.
Hindistanyň Çennai şäheriniň «Velammal MHS Mogappair» mekdebiniň okuwçysy Wişwanatana Ananda 12 ýaşa çenli ýaş derejesinde 15-nji dünýä çempiony boldy. Ikinji orna Lwowuň (Ukraina) akademiki gimnaziýasynyň okuwçylary çykdylar, Almaty şäheriniň (Gazagystan) Respublikan fizika we matematika mekdebiniň topary ýaryşy üçünji orunda tamamlady.
18 ýaşdan uly bolmadyk derejede hem Türkmenistandan ýene-de Türkmenabat şäherindäki 41-nji orta mekdebiň topary çykyş etdi. Onuň düzüminde 16 ýaşa ýetmedikleriň arasynda ýurdumyzyň häzirki çempiony Sanjar Gaýbullaýewiň (15 ýaşy), 14 ýaşa ýetmedikleriň arasynda ýurdumyzyň häzirki çempiony Gurbanmyrat Rüstemow (13 ýaş), mundan ozal resmi ýaryşlara gatnaşmadyk Begenç Artykow (16 ýaş) we ýakynda 15 ýaşa çenli mekdep okuwçylarynyň arasynda geçirilen Aziýa çempionatynyň kümüş medalçysy Gülmira Seýilhanowanyň gatnaşandygy bellärliklidir. Mümkin bolan 16 utukdan 9 utuk toplap, Türkmenabat şäheriniň mekdebiniň uly ýaşly ýygyndy topary hem gowy netije görkezdi – 43 toparyň arasynda 17-nji orun.
Türkmenabat şäherindäki 41-nji orta mekdebiň uly toparynyň agzalarynyň ortaça ýaşynyň on bäşe-de ýetmeýändigini bellemelidiris. Diýmek, ýetginjekler geljek birnäçe ýylda şol bir düzümde çykyşlaryny dowam etdirip bilerler. Bu bolsa, şübhesiz, ýaryşyň netijelerini has-da ýokarlandyrar.
Uly ýaş toparynda (U-18) Stambulyň ENKA hususy mekdebiniň okuwçylary 100% netije – 16 utuk görkezmek bilen, jedelsiz çempion boldular. Ikinji setirde – Almatynyň «Fizika-matematika mekdebi» (12 utuk). Ilkinji üçlügiň soňky hataryny «Velammal» mekdepler ulgamyndan başga bir Çennaý mekdebi eýeledi.
Sözümiziň ahyrynda Türkmenistanyň toparyny bu dünýä çempionatyna ibermäge ýurdumyzda küşdüň depginli we çalt ösmegine kömek edýän «Ýigit» HJ-niň uly ýardam berendigini aýtmak bolar.
