«Arkadag» toparynyň futbolçylary ilkinji gezek Türkmenistanyň çempiony diýen ada eýe boldular. Döwlet derejeli şäheriň adybir topary milli çempionat tamamlanmazdan dört tapgyr öň 23-nji tapgyrda paýtagtymyzyň «Altyn asyr» toparyny 4:0 hasabynda utup, şeýle üstünlik gazandy.

Aşgabadyň «Nisa» stadionynda geçirilen oýun «Arkadagyň» artykmaçlygynda geçdi, onda Welmyrat Ballakow (44-nji we 68-nji minutlarda) we hüjümçi Didar Durdyýew (58-nji we 60-njy minutlarda) iki pökgi geçirdiler.

Türkmenistanyň milli ýygyndysynyň esasyny düzýän «Arkadag» futbol kluby 2023-nji ýylda döredilip, ol milli çempionatda ilkinji gezek çykyş eden ýyly ýeňiji boldy. Bu üstünligi «Arkadagyň» soňky iki oýunda täze baş tälimçisi bolan Wladimir Baýramow hem paýlaşýar. Birinji oýunda «Arkadag» Maryda ýerli «Energetigi» 2:0 hasabynda ýeňdi, ikinjide 2018-nji ýylda AFK-nyň Kubogy ugrunda ýaryşyň finalçysy «Altyn asyry» 4:0 hasabynda utdy.

Türkmenistan milli ýygyndysynyň tanymal hüjümçisi Groznynyň «Tereginiň» düzüminde 2003/04-nji ýylda Russiýa Kubogyny we «Balkanyň» hatarynda 2013-nji ýylda geçirilen AFK-nyň prezidentiniň Kubogyny eýelän 43 ýaşly Wladimir Baýramow ýurdumyzyň milli ýygyndysynyň tanymal ýarym goragçysy Begençmuhammet Kulyýewiň ýolbaşçylygynda öňki oýunlarda ýekeje utuk-da ýitirmedik «Arkadagyň» baş tälimçisi wezipesine geçdi. 

Türkmenistanyň çempionaty tamamlanmazdan dört tapgyr öň «Arkadag» 20 oýunda 60 utuk toplady. Bir oýun az oýnan «Altyn asyryň» 44 utugy bar, topar bassyr ikinji ýyl wise-çempionlygy gazanar. «Nebitçi» – 20 oýundan 34 , «Aşgabat» – 22 oýundan 30 we «Ahal» – 18 oýundan 26 utuk bilen bürünç medala dalaş edýärler.