Paýtagtymyzda 15-nji aprelde halkara hokkeý ýaryşy başlandy. Tomaşaçylaryň ençemesi onuň açylyş dabarasyna milli telewideniýede göni ýaýlymda we Gyşky oýunlar sport toplumynyň münberlerinden tomaşa etdiler.

Kaşaň sport çäresiniň myhmanlary we oňa gatnaşýanlar üçin sport mekdepleriniň okuwçylary we ýaşajyk figuralaýyn typýan estrada aýdymçylarynyň gatnaşmagynda joşgunly çykyş etdiler.

Buz üstünde çykyş edenleriň arasynda kýorling boýunça Türkmenistanyň ýygyndy toparynyň baş tälimçisi Sakina Gulamalyýewa hem bardy. Ol ilki sporta figuralaýyn typmakdan başlady. Şeýle-de bolsa, belli bir wagtyň dowamynda gyşky sportuň dürli ugurlaryny özleşdirmegiň hötdesinden geldi.

Hokkeý boýunça halkara ýaryşynyň açylyş dabarasy mynasybetli ol ýörite ýaş aýdymçylar Döwran Şammyýew we Täzegül Baýramowa bilen tansly, aýdym-sazly çykyş taýýarlady.

Buz meýdançasynda çykyş etmek estrada aýdymçylary üçin täzelikdi. Şonuň üçinem Sakina Gulamalyýewa buzda typmak boýunça hünärmen hökmünde aýdymçylar bilen figuralaýyn typmak elementleri bilen ussatlyk sapagyny geçdi.

Sakina Gulamalyýewa:

– Biz sport hakda aýdym aýtdyk, onuň maksady türgenlerimizi ýeňşe ruhlandyrmakdy. Toparlaryň ählisi juda güýçli. Kimiň çempion boljakdygyny öňünden aýtmak kyn. Ýöne özüm-ä watanperwer hökmünde Türkmenistanyň «Galkan» hokkeý toparynyň janköýeri – diýdi.

Ýaryşyň şowhunly açylyşynda we ýaryşyň ilkinji gününde janköýerleriň güýçli goldawy Türkmenistanyň «Galkan» hokkeý toparyna uly ýeňiş getirdi. Bahreýnden hokkeý toparynyň wekilleri bilen duşuşan türkmen hokkeýçileri 8:1 hasabynda ynamly ýeňiş gazandylar.

Aşgabatda hokkeý baýramy dowam edýär. Sport ýaryşynyň türkmenistanlylaryň we ýurdumyzyň myhmanlarynyň ýadynda uzak galmagy üçin ýerli dokma önümlerini we beýleki ýadygärlik önümleri öndürijiler hokkeý ýaryşynyň nyşanlary bolan esbaplary janköýerlere hödürleýärler.