Samarkantda başlanan WKF karate boýunça 9-njy Merkezi Aziýa çempionatynyň birinji gününde türkmenistanly türgenler 7 – bir altyn, iki kümüş we dört bürünç medal gazandylar.
Bäsleşige dürli ýaş tapgyrynda kata (maşk görkeziş) we kumite (söweş) ugurlary boýunça medallar ugrunda Eýrandan, Gazagystandan, Gyrgyzystandan, Täjigistandan, Türkmenistandan we Özbegistandan 806 türgen gatnaşdy.
Türkmenistanyň Karate-do federasiýasynyň habaryna görä, ýaryşa ýurdumyzdan 74 türgen gatnaşýar.
Aşgabat şäheriniň ýöriteleşdirilen 61-nji orta mekdebiniň okuwçysy Alymuhammet Kakalyýew 55 kilograma çenli agram derejesinde 14 ýaşa çenli oglanlaryň arasynda kumite boýunça iň ýokary baýrak aldy.
Kümüş medallary Mary welaýatynyň Türkmengala etrabynyň 16-njy orta mekdebiniň 6-njy synp okuwçysy Gunça Tagansähedowa (14 ýaşa çenli gyzlaryň arasynda özbaşdak kata) we Aşgabat şäheriniň ýöriteleşdirilen 42-nji orta mekdebiniň altynjy synp okuwçysy Safiýa Nazarowa (agramy 40 kg çenli 12 ýaşa çenli gyzlaryň arasynda kumite) eýelediler.
Bürünç medallary Ahal welaýatynyň Gökdepe etrabynyň ýöriteleşdirilen 1-nji orta mekdebiniň 6-njy synp okuwçysy Öwezmyrat Sapadurdyýew (14 ýaşa çenli oglanlaryň arasynda özbaşdak kata), Balkanabadyň 1-nji orta mekdebiniň 6-njy synp okuwçysy Aýşa Ilgeldiýewa (14 ýaşa çenli gyzlaryň arasynda özbaşdak kata), Balkanabadyň 20-nji orta mekdebiniň 5-nji synp okuwçysy Medine Gaýlyýewa (40 kg çenli agramda 12 ýaşa çenli gyzlaryň arasynda kumite) we Aşgabat şäheriniň ýöriteleşdirilen 7-nji orta mekdebiň 8-nji synp okuwçysy Parahat Annaýew (55 kg-dan ýokary agramda 14 ýaşa çenli oglanlaryň arasynda kumite) mynasyp boldular.
