Türkmenistanyň futbol boýunça milli ýygyndy topary Türkiýe Respublikasynyň Antalýa şäherindäki okuw-türgenleşik ýygnanşygyna gidip, ol ýerde 4-nji iýuna çenli Dünýä çempionaty – 2026-nyň saýlama tapgyrynda Özbegistanyň we Gonkongyň toparlary bilen boljak duşuşyklara taýýarlyk görerler.
Türkmenistanyň Futbol federasiýasynyň habar berşi ýaly, Dünýä çempionaty – 2026-nyň saýlama tapgyryna taýýarlyk görmek üçin üç türkmen we bir gyrgyz toparyndan 24 futbolçy milli ýygyndy toparyna çagyryldy.
Milli ýygyndy toparyň hatarynda Türkiýedäki türgenleşik ýygnanşygyna derwezebanlar Rüstem Ahallyýew («Ahal»), Batyr Babaýew («Altyn asyr»), Gurbanmyrat Garaýew («Arkadag» futbol toparyndan), goragçylar Güýçmyrat Annagulyýew, Abdy Bäşimow, Mekan Saparow, Yhlas Toýjanow, Meýlis Durdyýew (hemmesi «Arkadag» futbol toparyndan), Ata Geldiýew, Hakmuhammet Bäşimow (ikisi-de «Ahal» futbol toparyndan), ýarymgoragçylar Arslanmyrat Amanow, Mirza Beknazarow, Welmyrat Ballakow, Şanazar Tirkişow (hemmesi «Arkadag» futbol toparyndan), Teýmur Çaryýew («Abdyş-Ata», Gyrgyzystan), Alybek Abdyrahmanow, Ýazgylyç Gurbanow (ikisi-de «Ahal» futbol toparyndan), hüjümçiler Didar Durdyýew, Altymyrat Annadurdyýew, Begenç Akmämmedow (üçüsi-de «Arkadag» futbol toparyndan), Myrat Annaýew, Selim Nurmyradow (ikisi-de «Altyn asyr» futbol toparyndan), Akmämmet Metdäýew we Elman Tagaýew (ikisi-de «Ahal» futbol toparyndan) çagyryldy.
Dünýä çempionaty – 2026-nyň saýlama tapgyrynyň 5-nji tapgyrynda Türkmenistanyň ýygyndy topary 6-njy iýunda Daşkentde Özbegistanyň milli ýygyndy topary we jemleýji saýlama tapgyrynda 11-nji iýunda Aşgabatda Gonkongyň ýygyndy topary bilen duşuşarlar.
Öňki duşuşyklarda türkmen futbolçylarynyň öz meýdançasynda Özbegistandan 1:3 hasabynda ýeňlendigini, Gonkong bilen 2:2 hasabynda deň oýnap, Eýranyň toparyndan myhmançylykda 0:5 we öz meýdançasynda 0:1 hasabynda ýeňlendigini ýatladýarys.
Dört tapgyrdan soň Türkmenistanyň futbol boýunça milli ýygyndy topary 1 utuk bilen «E» toparda üçünji orny eýeleýär. Ýaryşyň sanawynyň soňky ornundaky Gonkongyň toparynyň hem şonça utugy bar. Ilkinji orunlarda hersi 10 utuk toplan Eýranyň we Özbegistanyň toparlary barýar.
