Türkmenistanyň futbol boýunça milli ýygyndysy ýoldaşlyk duşuşygynda Grenlandiýanyň toparyny 5:0 hasabynda utdy. Oýun Türkiýäniň Antalýa şäherinde geçirildi, bu ýerde Mergen Orazowyň toparlary Dünýä çempionaty – 2026-nyň saýlama tapgyrynda Özbegistanyň we Gonkongyň toparlary bilen boljak duşuşyklara taýýarlyk görýärler.

Ýygyndy toparymyzdan 2-nji iýunda 35 ýaşyny belleýän Elman Tagaýew iki, Didar Durdyýew, Şanazar Tirkişow we Alybek Abdyrahmanow hersi bir pökgi geçirdiler.

Bu türkmen futbolynyň taryhynda Grenlandiýanyň milli ýygyndy topary bilen geçirilen ilkinji duşuşyk boldy. Grenlandiýanyň futbol boýunça ýygyndy topary Futbol federasiýasynyň Halkara futbol assosiasiýasynyň agzasy däldigi sebäpli FIFA reýtingine goşulmaýar. Häzirki wagtda Grenlandiýa futbolynyň halkara arenasyna girmeginde iki ýagdaý: awtonom ýeriniň Daniýa Patyşalygynyň düzüminde bolmagy we howa şertleri zerarly FIFA-nyň talaplaryna laýyk gelýän futbol meýdançalarynyň bolmazlygy böwet bolýar.

Şeýle bolsa-da, Grenlandiýanyň Futbol assosiasiýasy dünýä futboluna goşulmaga niýetinden el üzmäni 2024-nji ýylyň 28-nji maýynda Demirgazyk Amerikanyň geografiki bölegi hökmünde Demirgazyk we Merkezi Amerikada we Karib deňzinde futbolyň ösmegine gatnaşan alty kontinental FIFA konfederasiýasynyň biri bolan KONKAKAF-a girmäge resmi arza berdi. 

Türkmenistanyň futbol boýunça milli ýygyndysy Grenlandiýanyň milli ýygyndy topary bilen geçirilen synag duşuşygy 6-njy iýunda Daşkentde Özbegistanyň we 11-nji iýunda Aşgabatda Gonkongyň toparlary bilen Dünýä çempionaty – 2026-nyň saýlama tapgyrynyň öňüsyrasynda türkmen futbolçylary üçin gowy synag bolar diýip umyt edýäris.