Türkmenistanly agyr atletikaçylar Peruwyň paýtagty Lima şäherinde geçirilen agyr atletika boýunça ýetginjekleriň arasynda dünýä çempionatynda ýedi medal gazandylar. Ýaryşa dünýäniň 50 ýurdundan 17 ýaşa çenli 280 türgen, ýetginjekleriň we gyzlaryň arasynda hersinde agram derejesinde baýraklar ugrunda bäsleşdiler.
Türkmenistanyň toparyndan ýaryşa 7 türgen gatnaşdy, olaryň üçüsi ýurdumyza 3 altyn, 1 kümüş we 3 bürünç medal getirdiler.
Lebap welaýatyndan 17 ýaşly Süleýman Jafarow ýetginjekleriň arasynda dünýä çempiony boldy. Türkmenabat şäherindäki 5-nji orta mekdebiň 11-nji synp okuwçysy Süleýman Jafarow 102 kilograma çenli agram derejesinde 9 ýurtdan 10 agyr atletikaçylaryň arasynda bäsleşip üstünlik gazandy. Ol 137 kilogram, 141 kilogram we 143 kilogram agyrlykda üç synanyşygyň hemmesine bäs gelip, ştangany silterläp götermekde altyn medala mynasyp boldy. Süleýman ştangany itekläp götermekde 165 kilogram we 170 kilogram agyrlykda iki synanyşygyny ýerlikli ulanyp, bürünç medal gazandy. Iki görnüşiň jemi boýunça 313 kilogram netije gazanan ildeşimiz S.Jafarow hormat münberiniň ýokarky gatyna çykdy. Iki görnüşiň netijelerine görä, ştangany itekläp götermekde altyn medalyň eýesi siriýaly Ahmad Şammaa hem 313 kilogram (139+174) netije gazandy, ýöne ikinji boldy – çünki ol türgenimizden soň şeýle netije görkezdi. Maşal Mahmud (Müsür) ýaryşyň üçlügini – 310 kilogram (140+170) netije bilen ýapdy.
Süleýman kakasy Bagtyýar Jafarowyň elinde Türkmenabat şäherindäki 3-nji sport mekdebinde agyr atletika bilen meşgullanyp başlady. Häzirki wagtda ýaş türgen Türkmenistanyň ýetginjekler ýygyndysynyň baş tälimçisi Ahmet Saryýewiň ýolbaşçylygynda türgenleşik geçýär.
Ýene bir türkmen agyr atletikaçysy, Aşgabat şäherindäki Büzmeýin etrabyndaky 104-nji orta mekdebiň 8-nji synp okuwçysy Ogulşat Amanowa Türkmenistan toparyna üç medal getirildi. 17 ýurtdan 22 agyr atletikaçylaryň arasynda 49 kilograma çenli agram derejesinde bäsleşip alty synanyşygynyň bäşisini netijeli ulanyp, ştangany silterläp galdyrmakda 77 kilogram netije bilen altyn, ştangany itekläp götermekdäki 91 kilogram netijesi bilen bürünç medal gazanan bolsa, iki görnüşiň jemi boýunça görkezen 168 kilogram netijesi ony umumy hasapda kümüş medala ýetirdi.
Jemleýji hasapda kakasy Gurbandurdy Amanowdan tälim alýan 14 ýaşly Ogulşat Amanowa gyzlaryň arasynda Ýewropanyň çempiony 17 ýaşly Lýusiýa Gonsales Borregodan (Ispaniýa) – 169 kilogram (76+93) netijesi bilen 1 kilogram az we üçünji orny eýelän 15 ýaşly Margot Koçetowadan (Fransiýa) 163 kilogram (74+89) netijesi bilen 5 kilogram agyr ştanga göterdi.
Bu Ogulşat Amanowanyň ýetginjekleriň arasynda dünýä çempionatynda üçünji çykyşydyr. 2022-nji ýylda 12 ýaşynda Meksikanyň Leon şäherinde geçirilen şeýle ýaryşda ilkinji gezek çykyş edip, 45 kilograma çenli agram derejesinde 12 türgeniň arasynda 6-njy orny eýeledi, şahsy rekordlarynyň üçüsini goýdy — ştangany silterläp galdyrmakda (61 kilogram), itekläp götermekde (75 kilogram) we jemi 136 kilogram netijesi bilen gazandy. Geçen ýyl 156 kilogram agyrlykda ştanga göterip, (17 ýaşa çenli) ýetginjekleriň arasynda öňki görkezijisini 12 kilograma çenli ýetirip 45 kilograma çenli agramda dünýäniň çempiony boldy, bu ýyl bolsa 49 kilograma çenli agramda dünýäniň wise-çempiony boldy.
Beýleki bir türkmen agyr atletikaçysy, paýtagtymyzdaky «Olimp» orta sport mekdebiň 10-njy synp okuwçysy Didarbek Jumabaýew 67 kilograma çenli agram derejesinde ştangany itekläp götermekde 155 kilogram netije gazanyp bürünç medal aldy. Onda 15 ýurtdan 18 türgen bäsleşdi. Emma Baýmämmet Gulamowyň şägirdi ştangany silterläp galdyrmakda (117 kilogram) altynjy netije görkezip, iki görnüşiň jemi boýunça 272 kilogram netije bilen, 282 kilogram (127+155) netije bilen bürünç medal gazanan Aleksandr Baljiden (Moldowa) 10 kilogram az ştanga göterip, dördünji orny eýeledi. Hüseýin Hamuda (Müsür) şu agramda 286 kilogram (128+158) netije gazanyp dünýä çempionatynyň ýeňijisi boldy, ol 285 kilogram (129+156) netije bilen kümüş medal eýelän Akžola Kurmanbekden (Gazagystan) 1 kilogram artyk agram aldy.
Beýleki türkmen türgenleriniň arasynda Şabnam Kerimbaýewa (45 kilograma çenli agram derejesinde), (55 kilograma çenli agram derejesinde) jemi 142 kilogram (64+78) netije bilen 5-nji, Maýagözel Hürmenowa (55 kilograma çenli agram derejesinde) jemi 144 kilogram (65+79) netije bilen 11-nji, Zybagül Söýmüşewa (59 kilograma çenli agram derejesinde) 147 kilogram (66+81) netije bilen 10-njy orna düşdüler.
Agyr atletika boýunça ýetginjekleriň arasynda dünýä çempionaty geçirilen döwri Peruwyň Olimpiýa komitetiniň edarasynda dopinge garşy okuw sapagy geçirildi, oňa 75 töweregi türgen, şol sanda Türkmenistandan hem türgenler gatnaşdylar. Ony Halkara agyr atletika federasiýasy (IWF) Halkara barlag agentligi (ITA) bilen bilelikde gurady.
