Parižde geçen XXXIII tomusky Olimpiýa oýunlarynda agyr atletikaçylar 102 kilograma çenli agram derejesinde medallar ugrunda bäsleşdiler. Bu bäsleşige biziň ýurdumyzdan Türkmen döwlet bedenterbiýe we sport institutynyň uçurymy, häzir bolsa Türkmenistanyň Döwlet migrasiýa gullugynyň harby gullukçysy Dawranbek Hasanbaýew gatnaşdy.
Daşoguz welaýatynyň Akdepe etrabyndaky Nurmuhammet Andalyp geňeşliginiň Garamazy obasyndan 23 ýaşly sport ussady Olimpiada gatnaşmak hukugyny şu ýylyň aprel aýynda Phuketde (Taýland) geçen dünýä çempionatynda gazandy. Bu ýaryşlarda ol iň gowy netije 392 kilogram (silterläp götermekde 187 kg, itekläp götermekde 205 kg) agramy görkezmek bilen, dünýä reýtingindäki ornuny 18 dereje ýokarlandyryp, 26-njy orundan 8-nji orna çykdy we 102 kilograma çenli agram derejesinde iň güýçli agyr atletikaçylaryň onlugyna girdi.
Dünýä çempionatynda Dawranbek Hasanbaýew yzly-yzyna 180 kilogram, 185 kilogram, 187 kilogram agramlygy götermek bilen, üç synanyşygyň üçüsinden-de üstünlikli geçdi. Parižde geçen XXXIII tomusky Olimpiýa oýunlarynda silterläp götermekde ilkinji synanyşykda ol 180 kilogram agramyň hötdesinden geldi. Ikinji synanyşykda 187 kilogram agramy D.Hasanbaýew kellesinden ýokary galdyrdy, emma bellenýänçä saklap bilmedi. Jemleýji synanyşykda ol özi üçin rekord 188 kilogram agramy goýdurdy, ýöne bu gezegem ştangany kellesinden ýokarda saklap bilmedi. Netijede, biziň türgenimiz 186 kilogram agramy göterip, öňde barýan hytaýly Lýu Huanhuadan we ermenistanly Garik Karapetýandan 6 kilogram agram bilen yza galdy.
Dawranbek Hasanbaýew itekläp götermekde diňe ikinji synanyşykda 190 kilogram agramy göterdi, jemleýji synanyşykda bolsa 200 kilogram agramyň hötdesinden gelip bilmedi. Netijede, iki görnüşde 370 kilogram agramy götermek bilen, özüniň dünýä çempionatynda görkezen iň gowy netijesine 22 kilogram agrama ýetmän, 10-njy ýeri eýeledi.
Bu agram derejesinde 22 ýaşly Olimpiýa çempiony, dünýä rekordynyň eýesi (iki görnüşiň jemi we itekläp götermekde), 2023-nji ýylyň dünýä we Aziýa çempiony Lýu Huanhua 406 kilogram (186 + 220) agrama hötde gelip, altyn medal gazandy. Ol Hytaýda agramlary 100 kilogramdan geçýän agyr atletikaçylaryň arasynda ilkinji olimpiada çempiony boldy. Soňky synanyşykda ol itekläp götermekde täze dünýä rekordyny (233 kg) goýmaga synanyşdy ýöne bolmady.
Kümüş medala 24 ýaşly dünýäniň iki gezek çempiony we 109 kilograma çenli agram derejesinde Tokio olimpiadasynyň çempiony özbegistanly Akbar Joraýew 404 kilogram (185 + 219), bürünç medala aralyk baýdak astynda çykyş eden belarusly 25 ýaşly agyr atletikaçy Ýewgeniý Tihonsow 402 kilogram (183 + 219) agram bilen mynasyp boldylar.
Şeýlelik bilen, türkmen türgenleri Pariž Olimpiadasyndaky çykyşlaryny tamamladylar. Her dört ýyldan bir gezek geçirilýän bu baş ýaryşa biziň ýurdumyzdan sportuň dört görnüşi – dzýudo, ýeňil atletika, suwda ýüzme we agyr atletika boýunça 6 türgen gatnaşdy.
Dzýudoçylar Serdar Rahymow (66 kilograma çenli agram derejesinde) bilen Maýsa Pardaýewanyň (57 kilograma çenli agram derejesinde) hersi bir ýeňiş gazanyp, Olimpiadadaky çykyşlaryny çärýek finala bir ädim galanda tamamladylar. Ýüzüjiler Musa Žalaýew we Aýnur Primowa özlerine mahsus 100 metr aralykda erkekleriň arasynda erkin ýüzmek görnüşde, aýallaryň arasynda arkanlygyna ýatyp ýüzmekde öz gowy netijelerini görkezip bilmediler. Milli ýygyndy toparymyzdaky ýeke-täk wekili Walentina Meredowa-da 100 metre ylgamakda ýarym finala çykyp bilmedi, ýöne özüniň şu möwsümdäki iň gowy netijesini görkezdi – 11,95 sek. Mundan başga-da Pariž oýunlarynda deslapky ylgawda 70-nji metrde ýykylan günorta sudanly Lýusiýa Morise kömege laosly ylgawçy Silina Fa Afaý bilen bile gelip, olimpiýa ruhuny görkezdi. Olar pellehanadan soň lukmanlar gelip, ony göterip alyp gidýänçäler, şikes alan türgeniň ýanynda galdylar. Bu hereketleri bilen olar özara kömek we şepagatyň islendik bäsleşikden möhümdigini Olimpiadada görkezdiler.
Öňde täze dörtýyllyk olimpiýa aýlawy bar. Biziň türgenlerimiziň indiki olimpiýa oýunlaryna has gowy sport kysymynda gelmekleri üçin sport federasiýalarymyzyň tälimçilerinde türkmen türgenleriniň Olimpiada-2024-däki çykyşlaryny derňemäge ýeterlik wagt bar.
