17–23-nji awgust aralygynda Norwegiýada kýorling boýunça halkara okuw-türgenleşik ýygnanyşyklary 14 ýurtdan, şol sanda Türkmenistandan, Şwesiýadan, Ispaniýadan, Gazagystandan we beýleki ýurtlardan toparlary bir ýere jemlär.

Lillehammerde Ýaşlar lageriniň çäklerinde Türkmenistanyň ýetginjekler topary beýleki toparlar bilen türgenleşiklere, ussatlyk-sapaklaryna hem-de ýaryşlara gatnaşyp buzda oýnamak başarnyklaryny artdyrarlar. Ýaşlar türgenlerden başga-da, lagerde tälimçilere hem okuw geçiler.

Tälimçiler hünär başarnyklaryny ýokarlandyrmak boýunça okuwlary geçerler hem-de sportuň gyşky olimpiýa görnüşlerini has-da ösdürmek boýunça kärdeşleri bilen tejribe alyşarlar.

– Türkmenistanyň Kýorling federasiýasy 2020-nji ýylda döredildi. Häzirki wagtda ýurdumyz Bütindünýä Kýorling federasiýasynyň doly hukukly agzasy bolup durýar. Bu bolsa bize halkara derejeli ussatlardan öwrenmäge, toparda oýnap bilýän hünär derejeli türgenleri geljekde taýýarlamak üçin sportuň bu görnüşi boýunça tälimçilik derejeleri artdyrmaga mümkinçilik berýär – diýip, ýygyndynyň baş tälimçisi Sakina Gulamalyýewa gürrüň berýär.

Türgenleşik lagerine okuwa ugraýan ýetginjekler toparynyň düzüminde – 2023-nji ýylda Türkmenistanyň Kýorling federasiýasynyň açyk ýaryşynda üstünlikli çykyş eden türgenler bar. Toparyň kapitany – Emina Nurmuhammedowa, wise-kapitan – Aýşa Geldimyradowa. Birinji oýunçy – Daňatar Muhamow, ikinji oýunçy – Selim Baýramow.

Okuw tejribeliginiň netijeleri boýunça ýygnanyşyklarda toparlaryň arasynda ýoldaşlyk duşuşyklarynyň geçirilmegi meýilleşdirilýär.

Lillehammer sportuň gyşky görnüşleriniň merkezleriniň biri hökmünde bellidir. 1994-nji ýylda bu ýerde XVII gyşky olimpiýa oýunlary, 2016-njy ýylda bolsa – ikinji gyşky ýetginjekler olimpiýa oýunlary geçirilipdi. Halkara türgenleşik lageriniň guramaçylary şöhratly olimpiýa däplerini dowam edip, sportuň gyşky görnüşleri babatda Norwegiýanyň tejribesini paýlaşmagy hem-de tutuş dünýäniň ýaş türgenlerini we tälimçilerini goldamagy maksat edinýärler.