Türkmenistanyň ýetginjekler ýygyndysy 17–26-njy awgust aralygynda 17 ýaşa çenli ýetginjeklerden ybarat ýygyndylaryň arasynda Duşenbe şäherinde (Täjigistan) geçiriljek Merkezi Aziýa Futbol assosiasiýasynyň (CAFA) çempionatyna gatnaşar.
Bäsleşige 2 toparça bölünen 6 topar gatnaşar.
Bije atyşlygyň netijeleri boýunça, Türkmenistanyň (U17) ýetginjekler ýygyndysy CAFA-2024 çempionatynda «B» toparynda ýaryşarlar. Ýygyndy toparymyzyň garşydaşlary Özbegistanyň we Eýranyň ýygyndy toparlary bolar. «A» toparçada bolsa Täjigistanyň, Gyrgyzystanyň we Owganystanyň ýetginjekler ýygyndylary ýaryşarlar.
CAFA-2024 çempionatynyň toparçalaýyn tapgyry bir aýlawdan ybarat bolar. Şol duşuşyklaryň netijesinde toparçalarda birinji orunlary eýelän ýygyndylar final duşuşygyna gatnaşar. Toparlarynda ikinji orny eýelän toparçalar bürünç medallar üçin bäsleşer. Şeýle hem bäşinji we altynjy ýerler üçin teselli duşuşygy bolar.
Bu ýyl baş tälimçi hökmünde Türkmenistanyň ýetginjekler ýygyndysyna (U17) ozal «Altyn täç» toparynyň düzüminde ýaş futbolçylar bilen üstünlikli işlän 40 ýaşly Ahmet Allaberdiýew ýolbaşçylyk edýär. Ýurdumyzyň ýetginjekler ýygyndysy bilen işleşmekde oňa Ahmet Agamyradow, Daýançgylyç Urazow, Aleksandr Sidorow we derwezeban tälimçisi Naryman Garajaýew dagy gatnaşýar.
CAFA-2024 çempionatyna gatnaşmak üçin, Türkmenistanyň ýetginjekler ýygyndysyna (U17) tälimçiler topary 3 derwezeban, 8 goragçy, 9 ýarym goragçy we 3 hüjümçi bolmak bilen, 23 oýunçyny çagyrdy. Talapnama derwezebanlar Yzzat Erkinow, Atajan Ruslanow, Gökbatyr Myradow, goragçylar Gurbangeldi Kanaýew, Hajymuhammet Durdykakaýew, Kakamyrat Babaýew, Mihail Saparmyradow, Dawut Meredow, Ruslan Ýaýlymow, Eziz Myratlyýew, Orazýargylyç Urazow, ýarymgoragçylar Muhammedaly Nasyrow, Medet Muhammetmyradow, Hudaýnazar Meredow, Begenç Wepalyýew, Süleýmannazar Gowşudow, Ýunus Kalinow, Ýagmyr Hojyýew, Emirhan Mätgurbanow, Annamuhammet Rejebow, hüjümçiler Arslan Wepaýew, Weýsgeldi Orazdurdyýew, Mikael Stepanýan dagynyň atlary ýazyldy.
Türkmenistanyň ýetginjekler ýygyndysy bu ýaryşa gatnaşmagy ýetginjekler ýygyndylarynyň arasynda geçiriljek Aziýa kubogy – 2025-iň saýlama tapgyryna taýýarlyk hasaplanýar. Aziýa kubogy – 2025-iň saýlama tapgyrynda ýurdumyzyň ýetginjekler ýygyndysy «D» toparçada Taýlandyň, Hindistanyň hem-de Bruneýiň ýygyndy toparlary bilen 23-nji oktýabr bilen 28-nji oktýabr aralygynda Taýlandda bäsleşerler.
