Şu gün AFK Çagyryş ligasynyň 2024/25 möwsüminiň Kuala-Lumpurda (Malaýziýa) geçen bije çekişligiň netijeleri boýunça Türkmenistanyň «Arkadag» toparyna Kuweýtiň «Al-Arabi» topary, Maldiwlerden «Maziýa sports änd rekrieýşn» we Gyrgyzystandan «Abdyş-Ata» topary garşydaş boldy.
Täze möwsüm Aziýada erkekler klubunyň ähmiýeti boýunça üçünji täzelenen ýaryşy üçin ilkinji möwsüm bolar. Oňa geografiýa taýdan 2 zolaga: Günbatar we Gündogar zolaga bölünen 18 topar gatnaşar. Ähli toparyň toparlaýyn tapgyra gatnaşýandygy üçin AFK Çagyryş ligasy yklymyň ösüp barýan ligalarynyň toparlaryny öňe sürmegi we olaryň zehinini ýüze çykarmagy maksat edinýär.
Bije çekişligiň öňüsyrasynda «Arkadag» futbol toparynyň «Nejmeh» (Liwan) we «Al-Futuwa» (Siriýa) toparlary bilen birlikde ikinji sebede düşendigini bellemelidiris. Bu bolsa Türkmenistanyň häzirki çempionynyň we kubogynyň ýeňijisiniň ýaryşyň toparlaýyn tapgyrynda bu klublar bilen oýnamak mümkinçiligini aradan aýyrdy.
«Arkadag» futbol toparynyň geljekki garşydaşlary hakda birnäçe söz.
1953-nji ýylda döredilen «Al-Arabi» sport topary Kuweýtde iň «ýaşuly» topardyr. Onuň hyzmat ýazgylarynda 60-dan gowrak resmi baýragyň, şol sanda 1982-nji we 2003-nji ýyllarda Pars aýlagy ýurtlarynyň Çempionlar ligasynda gazanan 2 sany halkara baýragyň-da ady bar. «Al-Arabi» Aziýa Klublarynyň çempionatyna we AFK Çempionlar ligasynyň her birine dört gezek, AFK Kubogyna bolsa üç gezek gatnaşdy. Şonda ol iki gezek – 2009-njy ýylda Siriýanyň «Al-Karame» toparyndan jerime urgusy boýunça asgyn gelende – 4:5 (esasy wagtda – 0:0) we 2022-nji ýylda Omanyň «Al-Sib» toparyndan 1:2 hasabynda utulanda çärýek finala çykdy.
Maldiwleriň «Maziýa sports änd rekrieýşn» topary 1996-njy ýylda döredildi. Ol «Maziýa» sport we sagaldyş toparyna degişlidir. Bu topar bäş gezek Maldiwiň çempiony boldy, üç gezek Milli Futbol federasiýasynyň Kubogyny we iki gezek öz ýurdunyň Prezidentiniň Kubogyny gazandy. «Maziýa sports änd rekrieýşn» topary 2013-nji ýyldan bäri AFK Kubogyna 9 gezek gatnaşdy, ýöne Aziýanyň ähmiýeti boýunça ikinji topar ýaryşynda sport baýraklaryna mynasyp bolup bilmedi.
Gyrgyzystanyň Kant şäheriniň «Abdyş-Ata» futbol topary 2000-nji ýylda döredildi. 2003-nji ýyl möwsüminden bäri Gyrgyzystanyň ýokary ligasynda yzygiderli çykyş edýär. «Abdyş-Ata» Gyrgyzystanyň kubogyny bäş gezek (2007-nji, 2009-njy, 2011-nji, 2015-nji we 2022-nji ýyllarda) gazandy we iki gezek milli çempionatda (2022-nji we 2023-nji ýyllarda) ýeňiji boldy. Geçen ýyl «Abdyş-Ata» AFK kubogynda ilkinji gezek çykyş etdi, özem diýseň üstünlikli çykyş edip, Aziýanyň ähmiýeti boýunça ikinji klub ýaryşynyň toparyny diňe bir terk etmeg-ä gyrada dursun, gaýta ýarym finala çykmagy-da başaran ilkinji gyrgyzystanly klub boldy. Gyrgyzystanyň çempiony we AFK Kubogynyň ýarym finalçysy bolan Türkmenistanyň ýygyndy toparynyň ýarym goragçysy Teýmur Çaryýew 2023-nji ýylyň mart aýyndan bäri «Abdyş-Atan» toparynyň düzüminde üstünlikli oýnaýar.
«Arkadag» futbol topary we garşydaşlary «Günbatar» zolakda «B» topary döretdiler. Onuň oýunlary Kuweýtde merkezleşdirilen formatda geçiriler.
Galan toparlaryň düzümleri şeýle:
«Günbatar» zolak
«A» topar: «Ist Bengal» (Hindistan), «Nejmeh» (Liwan), «Başundhara Kiňs» (Bangladeş), «Paro» (Butan, topar eýesi).
«C» topar: «Al Ahli» (Bahreýn), «Al Futuwa» (Siriýa), «Al Sib» (Oman, topar eýesi), «Hilal Al Kuds» (Palestina).
«Gündogar» zolak
«D» topar: «Şaň Ýunaýted» (Mýanma, topar eýesi), «Taýnan siti» (Taýwan), «Ýaň elefents» (Laos).
«E» topar: «Madura Ýunaýted» (Indoneziýa), «Prea Han Riç Swaý Rieň» (Kamboja), «SP Falkons» (Mongoliýa, topar eýesi).
Toparlaryň oýunlary 26-njy oktýabr bilen 3-nji noýabr aralygynda üç oýun gününde merkezleşdirilen görnüşde geçiriler, onda her topar her garşydaşy bilen bir gezek duşuşar.
Toparlaýyn tapgyryň netijeleri boýunça, sekiz toparça: toparçalardan üç ýeňiji we Günbatar zolakda ikinji orunlary eýelänleriň iň ökdesi, şeýle hem Gündogar zolagyň her toparçasyndan iň gowy iki toparça çärýek finala çykar.
Pleý-off oýunlary myhmançylykda oýnalar. Çärýek final oýunlary 2025-nji ýylyň 5-nji martyndan 14-nji martyna çenli, ýarym final oýunlary 2025-nji ýylyň 9-njy aprelinden 18-nji apreline çenli bolar, final oýunlary bolsa 2025-nji ýylyň 10-njy maýyna meýilleşdirilipdir.
