«Ahal» toparynyň futbolçylary birinji çärýek final oýnunda «Köpetdag» toparyny 2:1 hasabynda utup, Türkmenistanyň Kubogy ugrunda ýaryşyň ýarym finalyna tarap ädim ätdiler. Oýun paýtagtymyzyň «Nusaý» stadionynda geçirildi.
Oýnuň 3-nji minudynda Şiri Annaýewiň takyk urgusyndan soň «Köpetdag» topary öňe saýlandy. 20-nji minutda Meýlis Diniýew hasaby deňledi – 1:1. 71-nji minutda bolsa «Ahal» toparynyň kapitany Elman Tagaýew 11 metrlik jerime urgusyndan toparyna ýeňiş getirdi.
Welsähet Öwezowyň topary jogap çärýek final oýnundan öň has gowy netije gazanyp bilerdi. Emma ikinji ýaryma goşmaça berlen wagtyň soňky minudynda Meýlis Diniýew 11 metrlik jerime urgusyny dürs urup bilmedi. Şunda derwezeban Batyr Geldiýew pökgini aýagy bilen yzyna gaýtardy.
Bu täze tälimçiniň ýolbaşçylygynda «Ahal» toparynyň ikinji ýeňşidir, çünki toparyň öňki tälimçisi Döwletmyrat Annaýew Türkmenistanyň ýaşlar toparyna (20 ýaşa çenli) ýolbaşçylyk edýär, ýygyndy 2025-nji ýyldaky Aziýa Kubogy ugrunda ýaryşyň saýlama oýunlaryna taýýarlanýar. Ozal W.Öwezowyň topary Türkmenistanyň futbol çempionatynyň üçünji tapgyrynyň ilkinji oýnunda «Aşgabat» toparyndan 3:0 hasabynda üstün çykdy.
1/4 finalyň jogap oýny 8-nji sentýabrda «Köpetdag» toparynyň meýdançasynda geçiriler.
2024-nji ýyldaky Türkmenistan Kubogy ugrunda ýaryşyň beýleki çärýek final oýunlarynda «Nusaý» stadionynda «Arkadag» futbol toparynyň Türkmenbaşynyň «Şagadam» toparyndan 3:0 hasabynda üstün çykandygyny, «Altyn asyr» toparynyň öz meýdançasynda «Merw» toparyny 3:1, «Aşgabat» toparynyň bolsa Balkanabadyň «Nebitçi» toparyny 2:1 hasabynda ýeňendigini ýatladýarys.
