Futbol boýunça ýokary liganyň klublarynyň arasynda Türkmenistanyň çempionatynyň soňa geçirilen iki oýny Aşgabatda netijeli tamamlandy.
AFK-nyň Çempionlar ligasy – 2-niň saýlama ýaryşyna Türkmenistanyň wise-çempionynyň gatnaşmagy sebäpli soňa geçirilen 19-njy tapgyryň oýnunda «Altyn asyr» topary paýtagtymyzyň Büzmeýin etrabynyň «Sport toplumy» stadionynda Marynyň «Merw» toparyny kabul etdi. Oýun garşydaşynyň derwezesine jogapsyz bäş pökgi geçiren meýdança eýeleriniň artykmaçlygynda geçdi. Pökgüleriň dördüsi oýnuň birinji ýarymynda tora girdi.
Duşuşygyň 11-nji minudynda Myrat Annaýew 11 metrlik jerime urgusyndan hasaby açdy. 20-nji we 25-nji minutlarda Röwşengeldi Halmämmedow iki pökgi geçirdi. 34-nji minutda Ahmet Ataýew hasaby 4:0-a ýetirdi. Mihail Titow bolsa 50-nji minutda 11 metrlik jerime urgusyny dürs urup, ýeňiş pökgüsini tora saldy.
21-nji tapgyryň çäklerinde geçirilen ýene bir oýunda «Arkadag» topary bilen Balkanabadyň «Nebitçi» toparynyň duşuşygy Ahal welaýatynyň Gökdepe etrabynyň Babarap geňeşligindäki stadionda geçirildi. Eýýäm oýnuň başynda garşydaşlar birek-biregiň derwezesine pökgi saldylar: myhmanlar 12-nji minutda Didar Durdyýewiň 11 metrlik jerime urgusyndan salan pökgüsine bir minut soň Muhammet Annaýewiň takyk pökgüsi bilen jogap berdiler.
Soňra oýun meýdança eýeleriniň artykmaçlygynda geçdi. 27-nji minutda ikinji pökgini geçiren Didar Durdyýew «Arkadag» toparyny öňe çykardy – 2:1. 42-nji minutda Begmyrat Baýow aratapawudy 3:1-e ýetirdi. Altymyrat Annadurdyýew 81-nji minutda 11 metrlik jerime urgusyndan we 85-nji minutda ýene bir topy garşydaşynyň toruna salyp, ikinji ýarymda «Nebitçi» toparynyň 5:1 hasabynda ýeňlişine sezewar boldy.
19 oýunda 19-njy ýeňşini gazanan «Arkadag» topary 57 utuk toplap, bir oýun az oýnan iň ýakyn garşydaşlary «Altyn asyr» toparyndan we «Ahal» toparyndan utuk tapawudyny 17-ä ýetirdi.
18-nji duşuşykda 10-njy gezek utulan «Merw» topary 24 utuk bilen 5-nji orunda galdy.Türkmenbaşy şäherinden «Şagadam» topary 27 utuk bilen dördünji orny eýeleýär.
Futbol boýunça Türkmenistanyň çempionatynyň 21-nji tapgyrynyň oýunlarynda: «Aşgabat» – «Köpetdag», «Ahal» – «Merw» we «Altyn asyr» – «Şagadam» toparlary duşuşarlar.
