Türkmen sportunyň taryhyna täze ajaýyp sahypa ýazyldy. Ony Ispaniýanyň Pontewedre şäherinde tamamlanan 20 ýaşa çenli pälwanlaryň arasynda geçirilen erkin göreş boýunça dünýä çempionatynda Türkmenistan üçin sportuň bu olimpiýa görnüşinde şeýle ýokary derejeli ýaryşlarda altyn medal gazanyp, Alp Arslan Begenjow ýazdy. Aşgabatly 18 ýaşly halkara derejeli sport ussady bu taryhy üstünligi 79 kilograma çenli agram derejesinde gazandy. Bu baýraga eýe bolmak ugrunda 28 pälwan güýç synanyşdy.
Ildeşimiz iň ýokary derejeli baýraga ýetmek ugrunda bäsdeşlerine bir utuk hem bermän 46:0 umumy hasap bilen bäş ýeňiş gazandy.
Ilkinji üç tutluşygyny Alp Arslan 10:0 hasabynda yzygiderlilikde Mahdi Mohammad Ýusefihajiwari (Eýran), Oleksandr Mamroşy (Ukraina) we belarusly türgen, «Jebisleşikli göreş dünýäsi» diýen halkara sport federasiýasynyň baýdagy astynda çykyş eden Dmitriý Lukaşçugy ýeňdi. Ýarym finalda A.Begenjow U-23 we U-20 Aziýa çempionatlarynyň bürünç baýragynyň eýesi Amit Amitden (Hindistan) – 11:0 hasabynda üstün çykdy, finalda bolsa 2022-nji ýylda Italiýada we 2023-nji ýylda Türkiýede geçen U-17 dünýä çempionatynyň iki gezek bürünç medalynyň eýesi hem-de Perudaky Panamerika-2024-iň çempiony Zakari Raýderi (ABŞ) – 5:0 hasabynda ýeňdi we hormat münberiniň iň ýokary basgançagyna çykdy.
Bu agram derejesinde bürünç medallary eýranly Mahdi Mohammad Ýusefihajiwari hem-de braziliýaly Leandro Arauho eýelediler.
Türkmenistanyň pälwanynyň altyn medalynyň üstünliginiň hormatyna 20 ýaşa çenli türgenleriň arasynda geçirilen erkin göreş boýunça dünýä çempionatynda Ispaniýanyň sport köşgüniň meýdançasynda ýurdumyzyň baýdagy galdyryldy we Türkmenistanyň senasy ýaňlandy.
30 ýyl mundan ozal, Çikagoda (ABŞ) geçen 17 ýaşa çenli kadetleriň arasyndaky dünýä çempionatynda Şöhrat Hojaýew grek-rim göreşinde Türkmenistan üçin ilkinji altyn medaly gazandy. Ine indi bolsa Alp Arslan Begenjow 20 ýaşa çenli türgenleriň arasynda geçirilen erkin göreş boýunça ýurdumyz üçin dünýä ýaryşynyň ilkinji altyn medalyny gazandy.
«Bu meniň arzuwymdy, şol arzuwymy amala aşyrandygyma hem-de Türkmenistanyň taryhynda ilkinji gezek erkin göreş boýunça dünýä çempiony bolandygyma men örän şat» diýip, finaldan soň bagtyýar A.Begenjow aýtdy.
Alp Arslan ilkinji gezek özüni 2022-nji ýylda tanatdy. Şonda ol Rumyniýada 17 ýaşa çenli kadetleriň arasynda geçirilen «Constantin Alexandru & Ioan W. Popovici» halkara ýaryşynda bu agram derejesinde üstünlikli çykyş etdi hem-de Bişkekde geçirilen Aziýa çempionatynda bu agram derejesinde altyn medaly gazandy. 2023-nji ýylda 17 ýaşa çenli kadetleriň arasynda geçirilen Aziýa çempionatynda ol bürünç medala mynasyp boldy.
Şeýle hem Alp Arslan Begenjow 2022-nji we 2023-nji ýyllarda 17 ýaşa çenli kadetleriň arasynda geçirilen dünýä çempionatlaryna gatnaşyp, şolarda degişlilikde 12-nji we 5-nji orunlary eýeledi.
Şu ýyl Alp Arlsan üçin onçakly üstünlikli başlamandy. Aprel aýynda ulularyň Aziýa çempionatynda ol 5-nji orny eýeledi, Gyrgyzystanda kwalifikasiýa olimpiýa ýaryşynda bolsa 11-nji orna düşüp, Parižde geçirilen Olimpiýada-2024-den galdy. Aziýa çempionatyndaky şowsuzlyk A.Begenjowa düýpli täsir etdi.
– Men Aziýa çempionatyndaky şowsuz çykyşymdan lapykeç boldum. Men depginli we yhlasly türgenleşip başladym hem-de iýunda Iordaniýanyň Amman şäherinde geçirilen 23 ýaşa çenli ýaşlaryň arasyndaky Aziýa çempionatynda bürünç medal, iýul aýynda Tailandyň Si-Raça şäherinde 20 ýaşa çenli türgenleriň arasynda geçirilen Aziýa çempionatynda altyn medal utdum, indi bolsa dünýä çempiony boldum – diýip, ol aýtdy.
Alp Arslan Begenjow erkin göreşiň başlangyçlaryny Aşgabatda öz daýysyndan öwrendi, şeýle hem Türkmenistanyň kadetler ýygyndy toparynyň baş tälimçisi Berdi Atabaýewiň elinde türgenleşik geçdi. Häzirki wagtda ol Ýapyk binalarda we söweş sungaty boýunça V Aziýa oýunlarynyň kümüş baýragynyň eýesi, häzir bolsa Türkmenistanyň 20 ýaşa çenli ýaşlar ýygyndy toparynyň baş tälimçisi Batyr Orazgylyjowyň ýolbaşçylygynda ussatlygyny kämilleşdirýär.
Şu ýyl Alp Arslan paýtagtymyzdaky Ýaş olimpiýaçylary taýýarlaýan mekdep-internatyny tamamlady we Türkmen döwlet maliýe institutyna okuwa girdi.
18 ýaşly zehinli türkmen pälwany geljekde 21-27-nji oktýabry aralygynda Tiran şäherinde (Albaniýa) geçiriljek 23 ýaşa çenli türgenleriň arasyndaky dünýä çempionatynda ilkinji gezek çykyş etmegi maksat edinýär. Şunda ol heniz ulularyň derejesinde çykyş etmegi meýilleşdirmeýär.
– Men heniz ulularyň derejesi üçin ýeterlik derejede fiziki taýdan güýçli däl. Maňa ulularyň arasynda dünýä çempiony derejesini utmak üçin has yhlasly türgenleşmek gerek – diýip, Alp Arslan Begenjow hasap edýär.
