Şu gün paýtagtymyzda badalga alan Türkmenistanyň Küşt federasiýasynyň Kubogy ugrunda 2-nji ýaryşa Aşgabatdan, Ahal, Daşoguz, Lebap we Mary welaýatlaryndan 285 küştçi gatnaşýar.
Ýaryş ýöriteleşdirilen Küşt-şaşka mekdebiniň zalynda geçiriler.
Ýaryş iki ugurda – FIDE-niň görkezijisi 1700 utuk we ondan ýokary bolan hem-de bu derejä ýetmedik küştçüleriň arasynda 11 tapgyrda Şweýsariýa ulgamyna laýyklykda geçirilýär. 6 ýaşdan 61 ýaşa çenliler bir toparda oýnaýarlar, bu ýaş küştçülere has tejribeli garşydaşlaryna garşy göreşde çynlakaý döwlerde tejribe toplamaga gowy mümkinçilik döredýär.
 |
 |
 |
 |
«A» kategoriýada FIDE-niň ussady Mergen Kakabaýew (FIDE görkezijisi – 2270), şeýle hem Budapeştde geçirilen 45-nji Bütindünýä küşt olimpiadasynda ýurdumyzyň erkekler toparynyň düzüminde üstünlikli çykyş eden Amanmuhammet Hommadow (2227), Allaýar Şirliýew (2246) baş sylaga esasy dalaşgärler hasaplanylýar. Ýurdumyzyň zenanlar toparynyň Wengriýanyň paýtagtyndaky Olimpiýa oýunlarynda erkekler ýaly kiçi altyn medal gazanan bäş agzasynyň hemmesi Federasiýanyň Kubogy ugrunda ýaryşa gatnaşýarlar. Iki ýyldan bir gezek geçirilýän bu abraýly toparlar ýaryşynda erkekler toparymyzyň «B», zenanlar toparynyň bolsa «C» kategoriýasynda birinji orny eýeleýändigini ýatladýarys.
Federasiýanyň Kubogy ugrunda Türkmenistanda birinji ýaryş geçirileni bäri halkara FIDE-niň görkezijisini hasaplamak bilen 130 küşt ýaryşy geçirildi.
Ýurdumyzyň Küşt federasiýasynyň başlygy Wepa Mälikgulyýewiň aýtmagyna görä, ýaryşlara yzygiderli gatnaşmak islendik küştçiniň ussatlygynyň ösmegi üçin möhüm şertdir, şol sebäpdenem Federasiýa küştçülerimiziň oýun tejribesini üpjün etmek üçin irginsiz işler alyp barýar.
Federasiýa Kubogy ugrunda ýaryşyň wagt gözegçilikli nusgawy görnüşi ýaryşy tamamlanandan soň rapid (çalt küşt) we blis (öte çalt) ýaryşlar 9-njy we 10-njy oktýabrda geçiriler.
Federasiýa Kubogynyň ýeňijisi iň abraýly milli ýaryşa – 2025-nji ýylyň fewral-mart aýlarynda geçiriljek Türkmenistanyň çempionatynyň ýokary ligasyna gatnaşmaga hukuk gazanar. Zenanlaryň arasynda iň gowy netije görkezen küştçi göni ýokary liga gatnaşar.
Çalt we blis ýaryşlarynyň ýeňijileri küşdüň bu görnüşlerinde Türkmenistanyň milli ýygyndysyny düzerler.
