Ýokary liganyň toparlarynyň arasynda Türkmenistanyň çempionatynyň 27-nji tapgyryň senesi süýşürilen duşuşygynda «Ahal» toparynyň futbolçylary paýtagtymyzyň «Köpetdag» toparyny 3:1 hasabynda ýeňdi.

Duşuşyk Ahal welaýatynyň Gökdepe etrabynyň Babarap geňeşliginiň Sport mekdep-internatynyň sport meýdançasynda geçirildi. 

Şu möwsümde «Ahal» hem-de «Köpetdag» toparlarynyň duşuşyklary gollara baý boldy. Birinji aýlawda «Köpetdag» topary 3:2 hasabynda ýeňdi, ikinjide we üçünjide bolsa «Ahal» topary garşydaşyndan 4:0 we 4:1 hasabynda iki gezek ynamly üstün çykdy. 

Bu toparlaryň dördünji duşuşygy ilkibaşda netijeli boljaga meňzemeýärdi. Duşuşygyň birinji ýarymy taraplaryň hiç birine-de üstünlik getirmedi – 0:0. Emma, arakesmeden soň, meýdançada ýagdaýlar düýbünden üýtgedi. 55-nji minutda Süleýman Mirzoýewiň goşandy netijesinde «Köpetdag» topary hasaby açdy – 1:0. Ýöne, myhmanlar muňa köp wagt begenmediler. Bir minutdan soň, Daýanç Meredow hasaby deňledi – 1:1. Ýene-de 3 minut geçenden soň bolsa, Türkmenistanyň IIM-niň toparynyň oýunçylarynyň sany azaldy – Goçmyrat Kakageldiýew iki sany sary duýduryşy üçin meýdançadan çykaryldy. 

San taýdan artykmaçlygyndan peýdalanyp, «Ahal» topary pursady ele aldy hem-de tiz wagtdan «Köpetdag» toparynyň derwezesine ýene-de iki pökgi geçirdi. Olary Ýazgylyç Gurbanow (68-nji minut) we Elman Tagaýew (86-njy minut) öz hasabyna ýazdylar. 

«Türkmennebitönümleri» Baş müdirliginiň topary ynamly ýeňiş gazanyp, 55 utuk topladylar hem-de milli ýaryşda ikinji orna geçdi. Ýaryş tertipnamasynda üçünji orunda barýan «Altyn asyr» toparynyň toplan utugy «Ahal» toparyndan üç utuk az ýöne, «Altyn asyr» topary iki oýny az oýnady. 

Futbol boýunça Türkmenistanyň çempionatynda «Ahal» we «Köpetdag» toparlarynyň nobatdaky duşuşyklary 30-njy oktýabrda geçirerler. Şol gün 28-nji tapgyrdaky oýunlaryň çäklerinde «Ahal» topary myhmançylykda «Merw» toparynyň garşysyna oýnar, «Köpetdag» topary bolsa paýtagtymyzda esasy oýna gatnaşyp, «Aşgabat» topary bilen duşuşar.