Ýagşygeldi Kakaýew adyndaky Halkara nebit we gaz uniwersitetinde ýaşlaryň arasynda robototehnika boýunça bäsleşik tamamlandy.
Ýokary okuw mekdebiň innowasion ylmy-okuw merkezi tarapyndan guralan bäsleşik 7-8-nji dekabrda iki günüň dowamynda geçirildi. Onuň çäklerinde tutuş ýurdumyzdan mekdep okuwçylaryň we talyplaryň 270-den gowrak ýaş zehinleri çykyş etdiler. Olar dört ugur: sumo-robotlar, ugra eýermek (gara çyzyk boýunça hereket edýän robotlar), labirint, toparlaýyn taslamalar boýunça bäsleşdiler. 
Bäsleşikleriň netijeleri boýunça oňa gatnaşanlaryň 18-si baýrakly orunlary eýelediler.
Şolaryň altysy birinji orunlara mynasyp boldular. Olar Ýusup Baýramdurdyýew (Oguz han adyndaky Inžener-tehnologiýalar uniwersiteti), Orazsähet Atamyradow (Türkmenistanyň Inžener-tehniki we ulag kommunikasiýalary instituty), Maksat Kakaýew (Aşgabat şäherindäki 96-njy orta mekdebi), Pirguly Öwezow, Maksat Kakajanow we Oguzhan Rejep ogly Annageldiýew (Halkara ynsanperwer ylymlary we ösüş uniwersiteti).
Paýtagtymyzdaky 129-njy, 86-njy, 97-nji, 27-nji orta mekdepleriniň, «Kämil bilim» okuw merkeziniň okuwçylary hem-de Ýagşygeldi Kakaýew adyndaky Halkara nebit we gaz uniwersitetiniň talyplary 6 sany ikinji we 6 sany üçünji orunlary eýelediler.
Sylaglanyş dabarasynyň dowamynda ýeňijilere gymmat bahaly sowgatlar gowşuryldy.
Bäsleşigiň çäklerinde sergi guralyp, onda robototehnika ulgamynda tehniki ýokary okuw mekdepler, ýöriteleşdirilen orta mekdepler hem-de ýurdumyzyň bilim merkezleri öz gazananlaryny görkezdiler.
Sergide görkezilen işläp taýýarlamalar diňe bir geň galdyrmaga däl, eýsem, oňa gatnaşyjylaryň dünýä garaýyşyny kemala getirmäge, olara tehnologiýalaryň çylşyrymly we täsin dünýäsine aralaşmaga mümkinçilik bermäge gönükdirilendir. Robotlaryň köpüsi Türkmenistanda ilkinji gezek görkezildi. «PETRONAS Carigali (Türkmenistan) Sdn Bhd» kompaniýasy tarapyndan görkezilen Anymal X robotyň çykyşy çärä gatnaşyjylaryň we myhmanlaryň ählisiniň aýratyn ünsüni çekdi. 
Bäsleşigiň guralyşynyň ýokary derejesini bellemek gerek, onuň dowamynda iň ownuk zada çenli ähli zat göz öňünde tutulypdyr, şonuň netijesinde bäsleşik sazlaşykly we üstünlikli geçdi. Ýaş zehinleriň ajaýyp festiwaly oňa gatnaşyjylaryň hemmesine ummasyz köp ýakymly täsirleri we duýgulary bagyş etdi. Umumy bähbitler bilen birleşen çärä gatnaşyjylar tejribe alyşdylar hem-de täze bilimler bilen birlikde täze dostlaryny hem-de pikirdeşlerini tapdylar. Robototehnika boýunça ýaşlaryň festiwaly her ýylky bäsleşik bolup, ýurdumyzyň dürli künjeklerinde ösüp gelýän we ukyply konstruktorlar üçin höwes bilen garaşylýan çäredir. Bäsleşige gatnaşmak isleýänleriň sany ýyl-ýyldan artýar, bu bolsa ýaşlaryň arasynda robototehnika gyzyklanmanyň barha artýandygyna şaýatlyk edýär.
Festiwaly geçirmegiň esasy maksady zehinli ýaşlary ýüze çykarmakdan, olaryň innowasion işlere gyzyklanmasyny ösdürmekden, robototehnikany wagyz etmekden, mekdep okuwçylaryň we talyplaryň tehniki konstruktorçylyga we modelirlemäge höwesini artdyrmakdan ybaratdyr.
