«Baky tyllanyň» esasy wezipesi informatika boýunça halkara olimpiada gatnaşmaklary üçin Türkmenistanyň ýaş zehinlerini ugrukdyrmak we goldamakdyr. Bu, mekdep okuwçylarynyň arasynda her ýyl geçirilýän informatika ylymlary boýunça bäsleşik bolup, oňa gatnaşýanlara algoritmik meseleleri çözmek we meýilleşdirmek teklip edilýär.
Şu ýylyň sentýabr aýynda informatika boýunça geçirilen 36-njy Halkara olimpiada dünýädäki orta we ýokary synp okuwçylary üçin abraýly ýaryş boldy. Oňa ýüze golaý ýurduň, şol sanda Türkmenistanyňam wekilleri gatnaşdy. Indiki olimpiada 2025-nji ýylyň tomsunda Boliwiýada geçiriler.
Ýurdumyzyň mekdep okuwçylaryny bu abraýly Olimpiada taýýarlamak üçin, «Baky Tylla» informatika, matematika we iňlis dili dersleri boýunça okuwlary hödürleýär. Merkeziň hünärmenleri informatika boýunça ýaşlykda alnan düýpli bilim geljekde köp babatda hemişe artykmaçlyk berýär diýip hasap edýärler. Kompýuterleriň işleýşiniň esaslaryny bilmek we olar bilen işleşmegi başarmak gündelik meseleleriň iň amatly çözgüdini tapmaga we netijeli çözmäge kömek edýär. Şundan ugur alyp, olar okuwy döwrümizde iň giň ýaýran programmirleme dilleriniň biri bolan C ++ öwretmekden başlaýarlar. Soňra maglumat gurluşlary we algoritmler boýunça uniwersitet derejesindäki kurslar teklip edilýär, bu bilimlere tehniki söhbetdeşliklerde ýokary baha berilýär we olimpiadaçy hökmünde üstünlik gazanmak üçin, möhüm şert bolup durýar.
«Baky tylla» matematika okuwlary mesele çözmek endiklerini ýokarlandyrmaga we mekdep okuwçylaryny Informatika boýunça halkara olimpiada taýýarlamaga gönükdirilendir. Bilim merkezi düýpli matematika, üzňeleýin matematika we SAT matematika taýýarlyk okuwlaryny hödürleýär. Ähli okuw materiallary iňlis dilinde öwredilýär, şol sebäpli, kurslara ýazylmak üçin iňlis dilini gowy bilmeli. Okuwa gatnaşýanlaryň dil ukyplaryny we özüne ynamyny ýokarlandyrmak üçin, ýörite taýýarlanan iňlis dili okuwlary hödürlenýär.
Goşmaça maglumaty «Baky tyllanyň» resmi saýtynda ýa-da bilim merkezine baryp alyp bilersiňiz. Salgysy: A.Nyýazow şaýoly, 4-nji jaý, «Eýran Hodro» Biznes Merkezi, 3-nji gat, otag № 309-311.
Habarlaşmak üçin telefon belgisi: +993 64 445894.
