Türkmenistanyň okuwçylary Gazagystan Respublikasynyň paýtagty Astana şäherinde 13-17-nji ýanwar aralygynda geçirilýän «IzhO-2025» atly matematika, fizika we informatika boýunça XXI Halkara Žautyk olimpiadasyna gatnaşýarlar.
Olimpiada Gazagystan Respublikasynyň Bilim ministrliginiň goldaw bermeginde Respublikan fizika-matematika mekdebi we «Daryn» Respublikan ylmy-amaly merkezi tarapyndan guraldy.
Olimpiada 15 ýurtdan, şol sanda Gazagystandan, Türkmenistandan, Gyrgyzystandan, Özbegistandan, Täjigistandan, Russiýadan, Belarusdan, Ermenistandan, Azerbaýjandan, Türkiýeden, Gruziýadan, Bolgariýadan, Rumyniýadan, Serbiýadan we Mongoliýadan mekdep okuwçylarynyň 700-e hem-de terbiýeçi-ýolbaşçylaryň 150-ä golaýy gatnaşýarlar.
Olimpiada Astana IT uniwersitetiniň we Respublikan fizika-mekdebiniň binýadynda geçirilýär. Olar şeýle derejeli olimpiadalary geçirmek üçin enjamlaşdyrylandyr.
Bäş günlük bäsleşik iki tapgyry – nazary we amaly tapgyrlary özünde jemläp, olaryň wezipeleri ýöriteleşdirilen synplaryň maksatnamasyna laýyk gelýär hem-de halkara eminler tarapyndan işlenilip taýýarlanyldy.
Intellektual bäsleşigiň netijeleri boýunça ýeňijiler we baýrak eýeleri degişli derejelerdäki diplomlary, altyn, kümüş, bürünç medallary hem-de sowgatlary alarlar. Gatnaşyjylara olimpiada gatnaşandyklary baradaky şahadatnamalar we ýadygärlik sowgatlar gowşurylar.
Halkara Žautyk olimpiadasy 2005-nji ýyldan bäri geçirilýär hem-de däp boýunça mekdep okuwçylarynyň arasynda fizika-matematika ylymlaryny wagyz etmäge, halkara hyzmatdaşlygyny pugtalandyrmaga we bilim edaralaryň arasynda tejribe alyşmaga ýardam edýär.
