Döwletmämmet Azady adyndaky Türkmen milli dünýä dilleri institutynyň mugallymy Myrat Mälikow 26-njy ýanwardan 1-nji fewral aralygynda Angliýanyň Norwik bilim instituty (NILE) tarapyndan guralan hünär ýokarlandyryş maksatnamasyna gatnaşdy.

Maksatnama Beýik Britaniýanyň bilim ulgamyny çuňňur öwrenmek, mekdepleri dolandyrmak hem-de inklýuziwligi ösdürmegiň strategik usullaryny özleşdirmek maksady bilen Merkezi Aziýa ýurtlaryndan mugallymlaryň 26-syny bir ýere jemledi.

Maksatnamanyň çäklerinde mekdepleri we bilime aýratyn islegleri bolan okuwçylary goldamak babatda usullary hem-de tejribeleri öwrenmek boýunça okuwlar geçirildi, şeýle hem «Bilim, saglygy goraýyş we idemek meýilnamasyna» (EHCP) we Bäsdeşlik tejribesine (AP) esaslanan netijeli çemeleşmeler görkezildi.

1–8-nji fewral aralygynda institutyň hünärmeni Nottingem Trent uniwersitetinde (NTU) «Iňlis dili we inklýuziwlik» taslamasyna gatnaşýar. Bu taslama mugallymlara okatmagyň inklýuziw usullary barada habar bermegi, dürli okuwçylary goldamagy hem-de iňlis dilli bilimlerde deňligi ösdürmegi özünde jemleýär.

Bu taslama gatnaşyjylar üçin inklýuziw synpy dolandyrmagyň amaly usulyýetleri bilen tanyşdyrmaga gönükdirilen okuwlar guraldy. Şeýle hem diňleýjiler inklýuziw bilim beriş işini öwrenmek maksady bilen uniwersitetiň sapaklaryna hem-de bu ulgamda hünärmenleriň berýän umumy okuwlaryna barýarlar. Mundan başga-da, okuwyň dowamynda Beýik Britaniýanyň we Merkezi Aziýa ýurtlarynyň mugallymlarynyň arasynda degişli ugurlar boýunça çekişmeler geçirilýär.

Bu taslama iňlis dilini okatmagy hem-de inklýuziw bilimi kämilleşdirmäge ýardam bermäge gönükdirilendir. Taslamanyň netijeleri boýunça alnan bilimler okatmak ugrunda bar bolan çemeleşmeleri ösdürmek üçin gymmatly çeşme bolar.