26-njy fewralda paýtagtymyzyň gözel künjekleriniň birinde ýerleşýän Türkmenistanyň Jemgyýetçilik guramalarynyň merkezi binasynda «Türkmen Bitaraplygy — halkara parahatçylygyň we durnukly ösüşiň kepili» atly maslahat geçirildi. Oňa Türkmenistanyň Jemgyýetçilik guramalarynyň wekilleri, ylym-bilim işgärleri, talyp ýaşlar gatnaşdylar.

Türkmenistanyň Halk Maslahatynyň, Türkmenistanyň Mejlisiniň, Türkmenistanyň Demokratik partiýasynyň Syýasy Geňeşiniň, Aşgabat şäher häkimliginiň, Türkmenistanyň Demokratik partiýasynyň Aşgabat şäher komitetiniň guramagynda geçirilen bu maslahatda täsirli çykyşlar edildi.

Onda Türkmenistanyň Mejlisiniň deputaty Nepes Rozyýewiň, Aşgabat şäheriniň Büzmeýin etrap halk maslahatynyň agzasy Jahan Pirmuhammedowanyň, TDP-niň Syýasy Geňeşiniň guramaçylyk we syýasy işler bölüminiň müdiriniň orunbasary Bibiaýşa Saparowanyň, Türkmenistanyň Daşary işler ministrliginiň Halkara gatnaşyklar institutynyň kafedra müdiri, ilkinji partiýa guramasynyň başlygy Perhat Çaryýewiň, Aşgabat şäher medeniýet müdirliginiň merkezleşdirilen kitaphanalar ulgamynyň 1-nji derejeli kitaphanaçysy Arzygül Agaýewanyň çykyşlary diňlenildi.

Hormatly Prezidentimiziň baştutanlygynda, hemişelik Bitarap Türkmenistan döwletimiz dünýäniň abraýly halkara guramalary bolan Ýewropa Bileleşigi, Ýewropada Howpsuzlyk we Hyzmatdaşlyk Guramasy, Goşulyşmazlyk Hereketi, şol sanda Birleşen Milletler Guramasynyň degişli düzümleri bilen hyzmatdaşlykly gatnaşyklary alyp barýar. Şeýle gatnaşyklaryň aňyrsynda, ýagny hemişelik Bitarap döwletimiziň alyp barýan syýasatynyň özeninde adamzadyň parahatlygy, dostana goňşuçylyk gatnaşyklary, dawa-jenjelden azat durmuş, ynsan mertebesi bar. Maslahatda şular dogrusynda çykyşlar edildi, hemişelik Bitaraplygymyzyň halkymyza beren peşgeşi barada buýsançly gürrüňler el çarpyşmalar bilen utgaşdy.