Türkmenistanyň Daşary işler ministrliginiň Halkara gatnaşyklary institutynda Türkmenistanyň Birleşen Milletler Guramasyna agza bolmagynyň 33 ýyllygy we Türkmenistanyň hemişelik Bitaraplygynyň 30 ýyllygy mynasybetli sanly ulgam arkaly «Dil – hoşniýetli gatnaşyklaryň möhüm serişdesi» atly halkara okuw-usulyýet maslahaty geçirildi.
Maslahata Türkmenistanyň, Russiýanyň, Gyrgyzystanyň, Gazagystanyň, Azerbaýjanyň, Ermenistanyň, Eýranyň, Pakistanyň, Wengriýanyň, Rumyniýanyň, ABŞ-nyň, Bahreýniň we Koreýanyň ýokary we orta hünär okuw mekdepleriniň professor-mugallymlar düzüminiň wekilleri gatnaşdylar.
Çäre utgaşykly görnüşde türkmen, iňlis, rus we nemes dillerinde geçirildi. Maslahatyň dowamynda dünýäniň dürli ýurtlaryndan bolan kärdeşleriň arasynda giň gerimli ylmy dialog geçirildi, daşary ýurt dillerini okatmagyň meselelerine, innowasion tehnologiýalary netijeli ulanmak we bilim işine okatmagyň täze usullaryny ornaşdyrmak baradaky meselelere bagyşlanan çykyşlar diňlenildi. Maslahata gatnaşyjylar gymmatly hünär tejribelerini paýlaşdylar hem-de daşary ýurt dillerini üstünlikli we netijeli okatmagyň iş ýüzünde mysallaryny görkezdiler.
Halkara okuw-usulyýet maslahatynyň çäklerinde daşary ýurt dillerini öwrenmegiň hem-de olary okatmagyň işjeň we innowasion çemeleşmelerini ulanmagyň barha artýan ähmiýeti, şeýle hem halkara gatnaşyklaryny we medeniýetara kommunikasiýany ýola goýmakda we ösdürmekde daşary ýurt dilleriniň eýeleýän orny bilelikde ara alnyp maslahatlaşyldy.
Çärä gatnaşyjylar geçirilen maslahatyň bu ugurda Türkmenistanyň hem-de daşary ýurtlaryň ýokary okuw mekdepleriň arasynda hyzmatdaşlygyň işjeňleşmegine we bilimiň hiliniň ýokarlanmagyna, Türkmenistanyň ýokary we orta hünär okuw mekdeplerinde, şol sanda guramaçylyk-usulyýet, innowasion-pedagogik hem-de okuw-usuly ugurlarda daşary ýurt dillerini okatmagyň usulyny kämilleşdirmäge köp babatda ýardam etjekdigine ynam bildirdiler.
Mundan başga-da, okatmagyň halkara hyzmatdaşlygyň netijesinde işlenilip taýýarlanylan täze usullaryny we ýollaryny ornaşdyrmak hem-de daşary ýurt dillerini okatýan mugallymlaryň netijeli ulanmaklary üçin olaryň hünär başarnyklaryny ösdürmek ýaly geljege niýetlenen ileri tutulýan wezipeleri çözmekde bu maslahatyň uly ähmiýeti bellenildi.
