Türkmenistanyň milli ýygyndy toparynyň hokkeýçileri alty toparyň gatnaşmagynda 18 ýaşa çenli oýunçylaryň arasynda Bangkokda (Taýland) geçirilen ýetginjekler dünýä çempionatynda «B» toparçanyň üçünji bölüminde bürünç medallara eýe boldular.
«B» toparçanyň üçünji bölümi iň gowşak, derejesi boýunça ýedinji topar hasaplanýar. Onda TOP-y goşmak bilen, dört bölümde geçirilýän ýetginjekler dünýä çempionatynyň umumy synp bölünişiginde 41-den 46-a çenli ýerler ugrunda bäsleşýärler.
Üçünji bölümiň ondan ýokary derejeli «A» toparçasynda indiki ýyl dünýä çempionatyna gatnaşmak hukugyny alan baýrakly ýerleriň we ýaryşyň ýeňijisiniň ykbaly bäsleşigiň soňky gününde çözüldi. Soňky ýaryşyň öňýanynda «B» toparçada birinji orun ugrunda iki topar – duşuşykdan öň hersi 12 utuk toplan Taýlandyň we Özbegistanyň ýygyndy toparlary bäsleşdiler. Erjel çekeleşikli geçen duşuşyk özbek hokkeýçileriniň ýeňşi bilen tamamlandy – 3:2 (1:1, 1:1, 1:0).
Bürünç medallaryň ýeňijileri Türkmenistan bilen Bosniýa-Gersegowinanyň toparlarynyň arasynda bolan duşuşykda kesgitlendi. Bularyň hersi soňky tapgyrdan öň, degişlilikde, 6 we 5 utuk toplapdy. Bu duşuşykdan öň türkmenistanlylar Lýuksemburgyň toparyndan 8:2 (1:0, 3:2, 4:0) hasabynda üstün çykdylar, soňra Taýlandyň we Özbegistanyň toparlaryndan, degişlilikde 3:4 (1:0, 0:3, 2:1), 2:8 (2:4, 0:3, 0:1) hasabynda utuldylar. Ýöne Günorta Afrika Respublikasyndan gelen deň-duşlaryny utdylar – 18:7 (5:3, 3:1, 10:3).
Bosniýa-Gersegowinanyň topary bilen bolan duşuşykda biziň hokkeýçilerimize aňsat düşmedi. Olar duşuşygyň dowamynda hasap boýunça iki gezek utuldylar. Birinji döwürde jogap şaýbasyny Şöhrat Begliýew saldy. Ýöne ikinji 20 minutlykda Wisiliýe Wuçiniç türkmen toparynyň derwezesine ikinji şaýbany girizdi, şeýlelikde, toparlar ikinji arakesmä Bosniýa-Gersegowinanyň toparynyň peýdasyna 2:1 hasap bilen çykdylar.
Ahyrky döwürde buz üstündäki oýnuň hörpi düýpgöter üýtgedi. Muňa bosniýalylaryň derwezesine giren dört sany jogapsyz şaýba şaýatlyk edýär. Bu tapgyrda nobatdaky het-triki «Galkan» toparyna degişli Soltanhamit Wahidow amala aşyrdy. «Şir» toparynyň wekili Meretgeldi Kakaýew bolsa ýene bir şaýbany öz adyna ýazdyrdy.
Türkmenistanyň milli ýygyndy topary 5:2 (1:1, 0:1, 4:0) hasabynda ýeňiş gazanyp, kümüş medal alan Taýlandyň toparyndan 3 utuk yza galmak bilen, Bosniýa-Gersegowinanyň toparyny 5 utuk, Günorta Afrika Respublikasynyň toparyny 3 utuk we Lýuksemburgyň toparyny 1 utuk yzda goýup, ýaryşy 3-nji ýerde tamamlady.
Üçünji ýer bilen türkmen hokkeýçileri 2026-njy ýylda ýene-de üçünji bölümiň iň pes derejeli «B» toparçasynda bäsleşer.
Ýaryşlardan soň bilermen eminler oýnuň iň gowy oýunçylaryny bellediler. Bular: Bosniýa-Gersegowinanyň ýygyndy toparyndan goragçy Wisiliýe Wuçiniç, Türkmenistanyň ýygyndy toparyndan bolsa kapitan Şöhrat Begliýewdir.
Ýaryşyň iň gowy derwezeçisi diýlip Rustam Irgaşew (Özbegistan), iň gowy goragçysy hökmünde Natçaýatorn Ýannakornthanapunt (Taýland), iň gowy hüjümçi hökmünde Jasurbek Rustamhonow (Özbegistan) ykrar edildi.
Ýaryşda iň köp şaýba salan oýunçy Türkmenistanyň milli ýygyndysynyň hüjümçisi Soltanhamit Wahidow boldy. Onuň hasabynda 24 utuk (10 şaýba + 7 ýardam urgusy) bar. 14 şaýba we 8 sany ýardam urgusy bolan Jasurbek Rustamhonow (Özbegistan) ondan 2 utuk yza galýar. «Mergenler» üçlüginiň soňky hataryny «Şir» toparynyň wekili, türkmen hüjümçisi Isgenderhan Durdyýew 16 utuk (7 şaýba + 9 ýardam urgusy) eýeleýär.
Meýlis Kulyýewiň, kömekçileri Maksat Ataýewiň we Azatgeldi Bäşimowyň ýolbaşçylygynda taýýarlyk geçen türkmen hokkeýçileri şu derejedäki ýaryşlara ikinji gezek gatnaşdylar.
Taýlandda geçen 18 ýaşa çenli ýetginjekler dünýä çempionatynda Türkmenistanyň milli ýygyndysynyň düzüminde üç topardan 19 – Türkmenistanyň Söwda we daşary ykdysady aragatnaşyklar ministrliginiň «Şir» toparyndan 13, Türkmenistanyň Içeri işler ministrliginiň «Galkan» toparyndan 4 we «Türkmengaz» döwlet konserniniň «Oguzhan» toparyndan 2 hokkeýçi gatnaşdy.
Geçen ýyl Keýptaun şäherinde (GAR) U18 dünýä çempionatynda Guwanç Jepbarowyň we Maksat Ataýewiň ýolbaşçylygyndaky Türkmenistanyň ýetginjekler topary dört toparyň arasynda üçünji bölümiň «B» toparçasynda birinji ýeri «A» toparça çykmaga hukuk alan Gongkongyň hokkeýçilerine gidermek bilen, ikinji orny eýeledi.
