«Arkadag» toparynyň oýunçylary çärýek finalda Hindistanyň «Ist Bengal» toparyny ýeňip, AFK-nyň Çagyryş ligasynyň ýarymfinalyna çykdylar.

Bu toparlaryň bir hepde mundan öň Kalkuttada geçirilen birinji duşuşygy 1:0 hasabynda Türkmenistanyň iki gezek çempionynyň ýeňşi bilen tamamlandy. Jogap duşuşygy şu gün ilkinji gezek halkara ýaryşyny kabul eden Arkadag şäherinde geçirildi.

Şu waka mynasybetli Türkmenistanyň milli ýygyndysynyň esasy düzümini emele getirýän toparyň indiki ýeňşine garaşyp Arkadag şäheriniň 10 müň orunlyk stadionyny dolduran janköýerleriň arasynda baýramçylyk ruhy höküm sürdi.

Duşuşygyň başy meýdança eýelerini aljyraňňylyga saldy. «Ist Bengal» toparynyň 1-nji minutdaky ilkinji hüjümi şowly boldy. Onda Dimitrios Diamantakos meýdançanyň sag gyrasyndan jerime meýdançasyna girip, pökgüni derwezä gönükdirdi. Derwezeban Resul Çaryýewiň yzyna gaýtaran pökgüsi göni Rafael Messi Bouliniň aýagyna düşdi, olam pökgüni ýakyn aralykdan derwezäniň goragsyz galan burçuna gönükdirip, hasaby açdy.

Wladimir Baýramowyň oýunçylary şowsuzlygy düzetmäge howlukdylar. Ýöne garşydaşlarynyň derwezesine çynlakaý howp salyp bilmediler. Myhmanlar, tersine, seýrek, ýöne öte howply hüjüm etdiler. 17-nji minutda Dimitrios Diamantakos hasaby artdyryp biljekdi, onuň meýdançanyň ortasyndan öňe ylgap, 22 metrden pesden depen pökgüsi derwezäniň sütünine degip, yzyna gaýtdy, Riçard Selis ony dürs urup bilmedi.

29-njy minutda «Ist Bengal» toparynyň üstünligi berkitmäge hakyky pursady elden gidirdi, oýunçylaryň biri ýakyn aralykdan derwezä iki gezek hüjüm etdi. Ýöne onuň birinji pökgüsi goragça degdi, ikinjisi derwezebanyň eline düşdi.

33-nji minutda Lalçungnunga Ýazgylyç Gurbanowa garşy oýnandygy üçin ikinji sary kartoçka sebäpli meýdançadan çykarylandan soň, hindi topary on oýunçy bilen oýnamaly boldy. Ýöne azlykda-da Hindistanyň Naýbaşy Kubogynyň eýesi yzly-yzyna howply pursatlar döredýärdi. Olardan biri, 52-nji minutda D.Diamantakosyň geçiren pökgüsini D.Selis kellesi bilen urup, derwezä gönükdirdi, emma pökgi derwezäniň gapdalyndan geçdi.

Duşuşygyň ikinji ýarymynyň ahyrynda «Arkadag» topary oýnuny güýçlendirdi. Hüjümleriň birinde Sauwik Çakrabarti Şanazar Tirkişowy öz jerime meýdançasynda ýykdy, arakesmeden soň 89-njy minutda meýdança çykan Altymyrat Annadurdyýew liwanly emin Şeýh Ahmad Alaeddiniň bellän 11 metrlik jerime urgusyny dürs urdy. Duşuşygyň esasy wagtyna goşulan 8-nji minutda ýoldaşynyň takyk geçiren pökgüsini 13 metrden urup, ikinji pökgini tora salyp, Türkmenistanyň çempionyna 2:1 hasabynda ýeňiş getirdi.

Iki duşuşygyň netijesi boýunça 3:1 hasabynda utan «Arkadag» topary AFK-nyň Çagyryş ligasynda çykyş eden ilkinji ýylynda ýarymfinala çykmagy başardy. Türkmen futbol toparynyň ýarymfinaldaky garşydaşy «Al-Arabi» (Kuweýt) bilen «Al-Sib» (Oman) toparlarynyň arasyndaky duşuşygyň ýeňijisi bolar. Olaryň Kuweýtdäki ilkinji duşuşygynda «Al-Sib» topary «Al-Arabi» toparyny 1:0 hasabynda utupdy. AFK-nyň Çagyryş ligasynyň ýarymfinal duşuşyklary şu ýylyň 9-njy hem-de 16-njy aprelinde geçirilmegine garaşylýar. 

AFK-nyň Çagyryş ligasy Aziýanyň Çempionlar ligasynyň we AFK-nyň Çempionlar ligasy-2 ýaryşyna gatnaşyjylar bilen deňeşdirilende has gowşak toparlar gatnaşýan Aziýada üçünji derejeli topar ýaryşydyr. Ol futbola ukybyny görkezmäge hyjuwly toparlar üçin döredildi.