Daşoguzyň döwlet muzeýlerine gelýänler köp sanly gymmatly we hatda taryhy ülňülerde hem möhüm arheologiki tapyndylar bilen tanşyp bilýärler. Häzirki wagtda dowam edýän ýazky dynç alyş möwsüminde mekdep okuwçylary welaýatyň çäginde tapylan muzeý gymmatlyklary bilen tanyşýarlar.

«Köneürgenç» döwlet taryhy-medeni goraghanasynyň çäginde geçirilen gazuw-agtaryş işlerinde tapylan gadymy metal aýna bölegi olaryň ünsüni özüne çekýän özboluşly arheologiki tapyndylaryň biridir. Onuň ýasalan döwri entek kesgitlenmedi, ýöne aýnanyň mis esasy gadymy eýýamlarda ýasalandygyny görkezýär. Bary-ýogy 2,05 millimetr galyňlykdaky metal bölejiginiň arka tarapynda tegelek gülüň güberçek şekili bar.

Hünärmenleriň pikiriçe, ýalpyldadylan misden ýasalan aýnalar dünýäde has gadymyýetde peýda bolupdy. Adatça, gadymyýetde arka tarapy relýef bezeg bilen örtülipdir. Ol eýesini jyn-arwahdan goraýan tumar bolup hyzmat edipdir.

Beýik Ýüpek ýoly şol döwürde has gymmatly beýleki harytlaryň arasynda el aýnalarynyň giňden ýaýramagyna ýardam edipdir.

Abat galan dürli görnüşli aýnalar dürli döwürlerde ýurdumyzyň beýleki sebitlerinde hem tapyldy. Olaryň köp bölegi mis garyndydan ýasalandyr. Mekdep okuwçylary şunuň ýaly gadymy zatlar, olaryň üsti bilen dogduk topragyň taryhy bilen tanyşýarlar.