«Arkadag» toparynyň futbolçylary ýokary liganyň toparlarynyň arasynda geçirilýän futbol boýunça 2025-nji ýyldaky Türkmenistanyň çempionatyny Türkmenbaşynyň «Şagadam» toparyny uly ýeňlişe sezewar etmek bilen başlady – 4:0.

Duşuşyk Arkadag şäherinde 4-nji tapgyryň çäginde geçirildi. Türkmenistanyň häzirki iki gezek çempiony mundan öňki üç duşuşygy AFK-nyň Çagyryş ligasyna gatnaşandygy sebäpli goýberipdi.

Duşuşyk myhmanlaryň goragçylarynyň uly ýalňyşlygy bilen başlandy. Düýpden howpsuz ýagdaýda «Şagadam» toparynyň goragçysy Selim Ataýew pökgüni derwezebana bermek kararyna geldi, ýöne onuň bu hereketi şowsuz boldy we pökgini alan Yhlas Saparmämmedow 46-njy sekuntda ony derwezebanyň üstünden aşyryp, futbol boýunça 2025-nji ýyldaky Türkmenistanyň çempionatynda iň tiz salnan pökginiň eýesi boldy.

Arakesmeden öň, duşuşygyň 15-nji minudynda Arzuwguly Sapargulyýew meýdança eýeleriniň artykmaçlygyny 2:0 hasabyna ýetirdi. Duşuşygyň ikinji ýarymynda bolsa, 47-nji we 60-njy minutlarda Didar Durdyýew we Begenç Akmämmedow Hazar kenaryndan gelen toparyň derwezesine ýene iki pökgi geçirip, hasaby gutarnykly kesgitlediler.

Ilkinji ýeňlişine garamazdan, 4 oýun oýnap, 7 utuk toplan «Şagadam» topary ýaryş sanawynyň başynda galdy.

Futbol boýunça 2025-nji ýyldaky Türkmenistanyň çempionatynda wise-çempion «Ahal» topary hem ilkinji ýeňlişe sezewar boldy, ol «Aşgabat» stadionynda geçirilen duşuşykda geçen ýylky Türkmenistanyň çempionatyň bürünç medalynyň eýesi «Altyn asyr» toparyndan 0:1 hasabynda utuldy. «Türkmenaragatnaşyk» agentliginiň toparyndan ýeňiş pökgüsini 83-nji minutda Ruslan Täjiýew tora girizdi.

Bu ýeňişden soň, 6 utugy bolan «Altyn asyr» topary başa-baş duşuşygynda gazanan artykmaçlygy netijesinde, «Ahal» toparyndan öňe geçip, ikinji ýeri eýeledi. Iki topar hem 3 oýun oýnady.

Ahal welaýatynyň Gökdepe etrabynyň Babarap geňeşliginiň «Sport desga» stadionynda paýtagtymyzyň iki topary – «Köpetdag» bilen «Aşgabat» toparlarynyň arasyndaky duşuşyk 4-nji tapgyrda iň netijeli oýun boldy. Garşydaşlar öz aralarynda 5 pökgi geçirdiler. Üç pökgi «Köpetdag» toparynyň derwezesine girdi. «Köpetdag» topary Didar Didarowyň (32-nji minut) we Mežnun Durdyýewiň (71-nji minut) tagallalary bilen iki pökginiň jogabyny berdi, emma üçünji pökgini eýgermän, çempionatda ýeňlişden halas bolup bilmedi. Häzirki milli çempionatda ilkinji ýeňşini gazanan «Aşgabat» toparyndan Bäşim Gurbanberdiýew (25-nji minut), Begmyrat Pirgulyýew (66-njy minut) we Meýlis Gaýlyýew (86-njy minut) dagy tapawutlandylar.

4-nji tapgyryň Balkanabatda geçen ýene bir duşuşygy – «Nebitçi» bilen «Merw» toparlarynyň arasyndaky oýun ahyra çenli oýnalmady. 64-nji minutda hasap meýdança eýeleriniň peýdasyna 2:0-ka, «Merw» topary meýdançany terk etdi, şonuň üçin ähtimal, oňa 0:3 hasabynda tehniki ýeňliş ýazylar.

Futbol boýunça 2025-nji ýyldaky Türkmenistanyň çempionatynyň 5-nji tapgyry 2-nji aprelde «Merw» – «Arkadag» we «Aşgabat» – «Nebitçi» toparlarynyň arasyndaky duşuşyklar bilen başlar we 3-nji aprelde «Altyn asyr» – «Köpetdag» we «Şagadam» – «Ahal» toparlarynyň arasyndaky duşuşyklar bilen tamamlanar.