Berkarar döwletiň täze eýýamynyň Galkynyşy döwründe Garaşsyz, hemişelik Bitarap Diýarymyzyň gözel tebigatyny gorap saklamak, ýaş nesillerde türkmen tebigatyna söýgi döretmek boýunça netijeli işler alnyp barylýar.
Gülgüzar goýny dagly-düzli, derýaly-deňizli, sähraly-tokaýly Watanymyzyň baý ösümlik, haýwanat, şol sanda guşlar dünýäsi milli baýlyklarymyzyň özenini emele getirýär. Bu barada söhbet açylanda ýurdumyzda hemişelik we möwsümleýin ýaşaýan guşlar, olary gorap saklamak, öwrenmek boýunça ýurdumyzda tutumly işleriň alnyp barylýandygyny aýdyp geçmek buýsançlydyr. Guşlar parahat durmuşyň nyşany, asuda asmanyň bezegi. Halkara parahatçylyk we ynanyşmak ýylynda guşlar bilen baglanyşykly geçirilýän çäreleriň şanly ýylymyzyň şygary bilen utgaşmagy, onuň wajyp we çuňňur mazmunyny kesgitleýär.
Şu nukdaýnazardan ugur alnyp, her ýylyň 1-nji aprelinde bellenilýän Halkara guşlar gününe gabatlap, ýurdumyzda dürli çäreleriň geçirilmegi, oňa jemgyýetimiziň dürli ýaşdaky wekilleri bilen birlikde ýaş nesilleriň hem gatnaşmagy ajaýyp tebigatymyza, guşlar dünýäsine söýgi döretmekde aýratyn ähmiýete eýedir. Halkara guşlar güni mynasybetli Türkmenistanyň Magtymguly adyndaky Ýaşlar guramasynyň Lebap welaýat Geňeşi, welaýat Taryhy we ülkäni öwreniş muzeýi hem-de Türkmenistanyň Tebigaty goramak jemgyýetiniň welaýat bölümi welaýatyň çäginde ýerleşýän çagalar çeperçilik we sungat mekdepleriniň 15 – 17 ýaş aralygyndaky okuwçylarynyň arasynda «Guşlaryň owazy – parahatçylygyň güwäsi» atly döredijilik bäsleşigini yglan etdi.
Ýaş nesilleriň watançylyk duýgusyny kämilleşdirmek, tebigat bilen ysnyşyklylygyny, ekologik sowatlylygyny ýokarlandyrmak, şeýle hem zehinli suratkeş ýaşlary ýüze çykarmak maksady bilen geçirilen bu bäsleşige nakgaş, grafika we gobelen eserleriniň 80-e golaýy hödürlendi we olaryň sergisi ýaýbaňlandyryldy. Guşlar dünýäsiniň köpdürlüligini, ajaýyplyklaryny açyp görkezýän sergide Tebigaty goramak jemgyýetiniň welaýat bölümi tarapyndan ýurdumyzda ýaşaýan dürli guşlaryň gäpleriniň ýerleşdirilmegi oňa aýratyn gözellik çaýdy.
Gözel tebigatymyz bilen bilelikde we aýratynlykda guşlar barada döredilen surat eserleri ýaş suratkeşleriň synçylygynyň, kämillik derejesiniň barha ýokarlanýandygyny görkezdi. Täsirli geçen bäsleşikde Çärjew etrabynyň Farap şäherindäki çagalar sungat mekdebiniň okuwçysy Merjen Zarafşanowa 1-nji, şu mekdebiň 4-nji synp okuwçysy Mahira Umytjanowa hem-de Dänew etrabynyň Seýdi şäherindäki çagalar sungat mekdebiniň okuwçysy Maksat Şakirjanowa 2-nji, Saýat etrabynyň Sakar şäherindäki çagalar sungat mekdebiniň okuwçysy Mekan Muhtarbaýew, Türkmenabat şäherindäki çagalar çeperçilik mekdebiniň okuwçylary Eneş Rejepowa hem-de Melike Bekmuradowa 3-nji orna mynasyp boldular.
Şeýle hem Türkmenabat, Sakar şäherlerindäki, Dänew hem-de Hojambaz etraplaryndaky çagalar çeperçilik we sungat mekdeplerinde okaýan Aýlar Rustamowa, Ogulnur Meýlisowa, Şerhan Ruslanow we Söhbet Hudaýberenow dagy höweslendiriji baýraga eýe boldular. Bäsleşigiň ýeňijisine we baýrakly orunlara eýe bolan ýaş suratkeşlere Türkmenistanyň Magtymguly adyndaky Ýaşlar guramasynyň welaýat Geňeşiniň Hormat hatlary we sowgatlary gowşuryldy.
