Türkmenistanyň talyplary 20-22-nji aprel aralygynda Sankt-Peterburgyň maglumatlar tehnologiýalary, mehanika we optika milli barlaglar uniwersiteti tarapyndan guralan demirgazyk ýurtlaryň uniwersitetleriniň XI Halkara matematika olimpiadasynda (NCUMC-2025) üstünlikli çykyş etdiler.

Olimpiadanyň şahsy hasabynda biziň talyplarymyz 16 medal – 7 altyn we 9 kümüş medal eýelediler.

Altyn medalyň üçüsine Magtymguly adyndaky Türkmen döwlet uniwersitetiniň talyplary Şabibi Nurjanowa, Hajymuhammet Ataýew we Orazguly Gylyjow mynasyp boldular. Mundan başga-da, uniwersitetiň talyplary olimpiadanyň toparlaýyn hasabynda birinji orun aldylar.

Halkara ynsanperwer ylymlary we ösüş uniwersitetiniň talyby Selbi Ruslanowa, Türkmenistanyň Oguz han adyndaky Inžener-tehnologiýalar uniwersitetiniň talyby Gülöwser Gylyçmämmedowa, Türkmenistanyň Döwlet energetika institutynyň talyplary Muhammet Annaýew we Mergen Meredow altyn medalyň dördüsini eýelediler.

Rahmet Penjiýew, Kerim Toýlyýew (Halkara ynsanperwer ylymlary we ösüş uniwersiteti), Döwletgeldi Şakirjanow (Türkmenistanyň Oguz han adyndaky Inžener-tehnologiýalar uniwersiteti), Yslam Haýytmuhammedow (Ýagşygeldi Kakaýew adyndaky Halkara nebit we gaz uniwersiteti), Begenç Saparow (Türkmen döwlet ykdysadyýet we dolandyryş instituty), Gurtgeldi Hanow, Myrat Janmyradow (Seýitnazar Seýdi adyndaky Türkmen döwlet mugallymçylyk instituty), Batyr Öwezmyradow (Türkmen döwlet binagärlik-gurluşyk instituty) we Baýram Töräýew (Türkmenistanyň Döwlet energetika instituty) kümüş medal aldylar.

Olimpiadanyň toparlaýyn bäsleşiklerinde ikinji orny Türkmenistanyň Döwlet energetika institutynyň, üçünji orny Halkara ynsanperwer ylymlary we ösüş uniwersitetiniň talyplary eýelediler.

Şu ýyl abraýly matematiki gözden geçirilişe Russiýanyň, Türkmenistanyň, Belarusyň, Özbegistanyň, Gazagystanyň, Senegalyň hem-de Wýetnamyň ýokary okuw mekdeplerinden 350-den gowrak talyp gatnaşdy.