Mary welaýatynyň Mary atçylyk sport toplumynda Türkmen bedewiniň milli baýramy mynasybetli baýramçylyk atçapyşyklary geçirildi. Bu çäre ýurdumyzda giňden bellenilýän şanly senäniň derejesini we ähmiýetini belende göterdi. Baýramçylyk atçapyşyklaryna saýlama bedewler gatnaşdyryldy, ýeňiji bolan bedewlere döwlet derejesinde serpaýlar ýapyldy.
Bu gezek Marynyň atçylyk sport toplumynda şanly senäniň hormatyna at çapyşyklarynyň 7-si geçirildi. Birinji çapyşykda ýetginjek çapyksuwarlaryň atlanan üçýaşar bedewleri müň metr aralyk boýunça güýç synanyşdylar. Şonda örän çekeleşikli we gyzykly geçen bäsleşikde Türkmenistanyň Döwlet gümrük gullugynyň Mary welaýat gümrükhanasyna degişli Goçýigit atly bedew birinji gelmegi başardy. M.Guwanjowyň çapan bu bedewi bellenilen aralygy 1 minut 3,5 sekuntda geçmegi başardy.
Ikinji çapyşykda bolsa üçýaşar bedewleriň menzili 1200 metr boldy. Ýurdumyzyň dürli künjeklerinden gelen bedewler özleriniň baýramçylyk çapyşyklaryna taýýarlyk derejesiniň ýokarydygyny görkezdiler. Bedewleriň ýyndamlygy çapyşyksuwarlaryň ussatlygy bilen sazlaşyp, ýüwrük atlaryň öňe saýlanmagyny şertlendirdi. Şeýlelikde gyzykly geçen ikinji çapyşykda bellenilen aralyga 1 minut 20,5 sekunt wagty sarp eden Demirdon atly bedew birinji gelmegi başardy. Ol şahsy atşynas S.Süleýmanowyň hojalygyna degişli.
Üçünji çapyşykda hem aralyk 1200 mertr boldy. Çapyşyk başlandyram welin atlar orunlaryny ýygy-ýygydan çalşyp başladylar. Munuň özi bedewleriň ýeňşe bolan hyjuwyny görkezdi. Çekeleşikli geçen çapyşykda Türkmenistanyň Içeri işler ministrliginiň Mary welaýat Polisiýa müdirligine degişli Myradym atly dor bedew ýeňiji boldy. Ussat çapyksuwar B.Agamyradowyň çapan bedewi bellenilen aralygy 1 minut 17,2 sekuntda geçdi.
Dördünji çapyşyga dört we ulyýaşar bedewler goşuldylar. Olaryň menzili 1400 metr boldy. Çapyşykda öz işinde ýeterlik tejribe toplan çapyksuwarlaryň bedewlere ussatlyk bilen erk edişleri göründi. Çapyşyklara tomaşa edýänlere oňyn täsirini ýetiren bedewleriň arasyndan Garahanjar atly gara at ýeňiji bolmagy başardy. Ýurdumyzyň Içeri işler ministrliginiň Mary welaýat Polisiýa müdirligine degişli bedew bellenilen aralygy 1 minut 33,5 sekuntda geçip, degişli baýraga mynasyp boldy.
Bäşinji çapyşyga goşulýan dört we ulyýaşar atlar üçin hem aralyk 1400 metr boldy. Köpleri haýrana goýa çekeleşikli bäsleşikde Mary welaýatynyň Baýramaly şäher häkimligine degişli Ýantar atly dor at beýlekilerden öňe saýlanmagy başardy. G.Ýazberdiýewiň çapan dor bedewi kesgitlenen menzili 1 minut, 37,47 sekuntda geçip, bäşinji çapyşygyň baş baýragyna mynasyp boldy.
Altynjy çapyşykda dört uly ulyýaşar bedewleriň menzili 1800 metr boldy. Bedewleriň ýyndamlygyny, çapyksuwarlaryň ussatlygyny görkezýän aralyga goşulan bedewleriň çapyşygy has-da gyzykly boldy. Adamlar bu bäsleşigiň netijelerine ýokary baha berdiler. Şunda bellenilen aralygy 1 minut 31,2 sekuntda geçen Ýelsona ýeňiji bolmagy başardy. Şeýlelikde, ussat çapyksuwar B.Agamyradowyň erk eden dor bedewi çapyşygyň ýeňijisi diýlip ykrar edildi.
Köpleri garaşdyran ýedinji çapyşyga badalga berildi. Türkmen bedewiniň milli baýramy mynasybetli geçirilýän at çapyşygynyň ýedinji tapgyrynda halypa çapyksuwarlaryň erk edýän bedewleri özaralarynda güýç synanyşdylar. Ykbalyny atşynaslyga baglan halypa çapyksuwarlaryň menzili 1000 metr boldy. Olar özleriniň toplan tejribesini we yhlasyny gaýgyrman çapyşygyň gyzykly geçmegini şertlendirdiler.
Baýramçylyk çapyşyklarynyň jemleýjisinde halypa çapyksuwarlaryň öz ussatlyklaryny görkezdiler. Bu ýaryşda Marynyň döwlet athanasynyň çapyksuwary G.Handurdyýewiň erk eden Döwletli atly bedewi bellenilen aralygy 1 minut 5,39 sekuntda geçip, jemleýji çapyşygyň ýeňijisi boldy.
