2025-nji ýylyň 24-25-nji maýynda geçiriljek «Ak şäherim Aşgabat» atly XXIV köpugurly halkara sergä hasaba almak başlandy. Bu çäre Aşgabat şäher häkimligi we Türkmenistanyň Söwda-senagat palatasy tarapyndan guralýar.
25-nji maýda bellenýän Aşgabat şäheriniň gününe gabatlap geçirilýän bu sergi Türkmenistanyň gazanan üstünliklerini görkezmek hem-de paýtagtyň geljekde döwrebap, durnukly we ýaşamak üçin amatly metropolis hökmünde ösüşini ara alyp maslahatlaşmak üçin möhüm ýerlik bolar.
Onda ykdysadyýetiň dürli pudaklaryna, şol sanda şäher gurluşygy, binagärlik, ulag, jemgyýetçilik hyzmatlary, maglumat tehnologiýalary we beýleki pudaklarynyň wekilleri bolan ýolbaşçylardyr hünärmenler öz taslamalaryny görkezmäge, tejribe alyşmaga we şäher gurşawynyň ösüşindäki häzirki meseleleri ara alyp maslahatlaşmaga mümkinçilik taparlar. Bu çäre çalt depginde ösýän Aşgabatda bar bolan maýa goýum mümkinçiliklerini öwrenmek üçin ajaýyp ýerlik bilen üpjün eder.
Maslahat bilen bir wagtda geçiriljek sergi bolsa şäher durmuşynyň hilini ýokarlandyrmaga gönükdirilen innowasion çözgütleri, tehnologiýalary we taslamalary görkezmek üçin ýerlik bolar. Şereketler we guramalar gurluşyk, abadanlaşdyryş, «akylly şäher» we şuňa meňzeş beýleki pudaklardaky işlerini görkezip bilerler.
«Ak şäherim Aşgabat» atly XXIV köpugurly halkara sergi täze işewür gatnaşyklary ýola goýmak, maýa goýumlaryny çekmek we Aşgabadyň uly göwrümli ösüş taslamalaryny durmuşa geçirmekde hyzmatdaşlyk mümkinçiliklerini öwrenmek üçin ajaýyp mümkinçilik döreder.
Has anyk maglumat almak we maslahata gatnaşmaga hasaba durmak üçin, çäräniň resmi saýtyna giriň.
