Şu gün paýtagtymyzda, Türkmenistanyň Döwlet medeniýet merkeziniň Mukamlar köşgünde «Halkara parahatçylyk we ynanyşmak ýyly – sport parahatçylygyň ilçisi» atly dabaraly hoşallyk maslahaty geçirildi.

Maslahatda halkara derejesinde geçirilýän sport bäsleşiklerinde türkmen türgenlerimiziň üstünlikli çykyş edip, bütin dünýäde türkmen sportunyň abraýyny has-da belende götermek ugrunda gazanýan ýeňişleriniň we üstünlikleriniň syýasy-jemgyýetçilik ähmiýetini wagyz-nesihat etmäge bagyşlandy.

Dabaraly hoşallyk maslahatyna ýurdumyzyň Hökümet agzalary, ministrlikleriniň we pudaklaýyn dolandyryş edaralarynyň ýolbaşçylary, ýaşulylar we eneler, köpçülikleýin habar beriş serişdeleriniň, sport, medeniýet, sungat, bilim, ylym ulgamlarynyň wekilleri hem-de talyp ýaşlar gatnaşdylar.

Dabaraly maslahatda çykyş edenler ilki bilen “Halkara parahatçylyk we ynanyşmak” ýylynda ýurdumyzyň sport ulgamynda gazanylan uly üstünlik bolup halkymyzyň guwanjyna we buýsanjyna öwrülen Aziýa Futbol Konfederasiýasynyň Çagyryş Ligasynyň final duşuşygynda “Arkadag” futbol toparynyň taryhy ýeňşi bilen Gahryman Arkadagymyzy hem-de Arkadagly Gahryman Serdarymyzy, şeýle hem maslahata gatnaşyjylary tüýs ýürekden gutladylar we şeýle ýeňişleriň dowamly bolmagyny arzuw etdiler.