Düýn Türkmenistanyň Jemgyýetçilik guramalarynyň merkezinde «Türkmenistanyň Konstitusiýasy – ýurdumyzyň hemişelik Bitaraplygynyň hukuk kepili, Döwlet baýdagy – halkara parahatçylygyň nyşany» atly ylmy-amaly maslahat geçirildi. 

Türkmenistanyň Konstitusiýasynyň we Döwlet baýdagynyň güni mynasybetli geçirilen maslahata Mejlisiň deputatlary, Aşgabat şäher halk maslahatynyň agzalary, syýasy partiýalaryň, jemgyýetçilik guramalaryň, ykdysadyýetiň dürli pudaklarynyň, köpçülikleýin habar beriş serişdeleriniň wekilleri, alymlar, mugallymlar, ýaşlar, welaýatlardan gelen myhmanlar gatnaşdylar.

Türkmenistanyň Konstitusiýasynyň we Döwlet baýdagynyň gününiň hemişelik Bitaraplygymyzyň şanly 30 ýyllyk senesi bilen utgaşyp gelmegi buýsandyryjydyr. Türkmenistanyň Konstitusiýasy döwletimiziň Esasy Kanuny bolmak bilen, kanunçylyk-hukuk esaslarynyň gözbaşydyr. 1992-nji ýylyň 18-nji maýynda kabul edilen Konstitusiýamyz esasynda ýurdumyzdaky dünýä ähmiýetli iň wajyp işler hukuk taýdan öz beýanyny tapdy.

Maslahat başlamazdan öň ýurdumyzyň medeniýet we sungat ussatlarynyň ýerine ýetiren aýdym-sazly çykyşlary myhmanlara baýramçylyk joşgunyny berdi we bu ýerde guralan amaly-haşam sungatynyň eserleriniň we kitaplaryň sergisi Watanymyzyň ösüşlerini beýan etdi.