Ýokary liganyň toparlarynyň arasynda geçirilýän 2025-nji ýyldaky futbol boýunça Türkmenistanyň çempionatynyň 11-nji tapgyrynyň jemleýji duşuşygy paýtagtymyzyň «Altyn asyr» toparynyň «Ahal» toparyndan üstün çykmagy bilen tamamlandy – 3:1 hasabynda.
Duşuşyk Aşgabat şäheriniň Büzmeýin etrabynda ýerleşýän «Sport toplumy» stadionynda geçirildi.
Bu eýýäm häzirki milli çempionatda esasy garşydaşlaryň arasyndaky ikinji duşuşykdy. Myhmançylykda geçen birinji aýlawda «Altyn asyr» topary 83-nji minutda Ruslan Täjiýewiň takyk urgusy netijesinde gazanylan iň az hasap bilen ýeňiş gazandy – 1:0 hasabynda.
«Ahal» topary jogap duşuşygynda janköýerleriniň öňünde abraýyny dikeltmek islese-de, başarmady.
Ýeňijilerden Abdyrahman Annamyradowyň (12-nji minut) we Ruslan Täjiýewiň (36-njy) tapawutlanan bu duşuşygy, «Ahal» toparynyň oýunçysy Nazar Towakelowyň duşuşygyň birinji ýarymynda ilki «Altyn asyr» toparyň (29-njy minut) derwezesine, duşuşygyň ikinji ýarymynda bolsa öz derwezesine top salandygy bilen-de tapawutlandy. Bu waka 72-nji minutda bolup geçdi.
Bu ýeňişden soň Ýazguly Hojageldiýewiň topary 22 utuk toplap, ýaryşyň tertibinde ilkinji iki orny eýeleýän «Arkadag» topary bilen «Ahal» toparyna çenli aralygy 2 utuga çenli azaltdy. Ýöne «Altyn asyr» topary 10, «Ahal» topary 11, «Arkadag» topary bolsa 8 oýun oýnapdyr.
Iň köp top salanlaryň arasynda birinji orny hersi 6 top salan «Arkadag» toparynyň hüjümçisi Altymyrat Annadurdyýew bilen Didar Durdyýew paýlaşýar. Olaryň topardaşlary Begenç Akmämmedow, Yhlas Saparmämmedow we Meýlis Diniýew («Ahal») dagy bir top az saldyrlar. Abdyresul Abdyýew («Merw») bilen Zafar Babajanowyň («Altyn asyr») her biri 4 top saldy. Mekan Aşyrowyň («Şagadam»), Bäşim Gurbanberdiýewiň («Aşgabat») we Daýanç Meredowyň («Ahal») hersiniň hasabynda 3 salnan top bar. Myrat Annaýew, Süleýman Muhadow, Selim Nurmyradow, Ruslan Täjiýew (dördüsem «Altyn asyr»), Gurban Annaýew, Elman Tagaýew (ikisem «Ahal»), Meýlis Gaýlyýew, Pirmyrat Soltanow (ikisem «Aşgabat»), Yhlas Magtymow («Şagadam») we Şanazar Tirkişow («Arkadag») dagynyň hersi garşydaş derwezelere 2 topdan saldylar.
