20-nji maýda Türkmenistanyň Jemgyýetçilik guramalarynyň merkezinde «Ösüşlere beslenen parahat, asuda Watanyň buýsançly zenanlary» atly wagyz-nesihat çäresi geçirildi. Çäre Türkmenistanyň Zenanlar birleşiginiň Merkezi Geňeşiniň, Türkmenistanyň Demokratik partiýasynyň Syýasy Geňeşiniň ilkinji zenanlar guramasynyň bilelikde guramagynda geçirildi.

Wagyz-nesihat çäresine jemgyýetçilik guramalarynyň wekilleri, zenanlar, paýtagtymyzyň çagalar baglarynyň terbiýeçileri, Saglyk öýleriniň maşgala lukmanlary, Aşgabat şäher polisiýa müdirliginiň wekilleri gatnaşdylar.

Tegelek stolda geçirilen bu ýygnanyşykda halallyk, adamkärçilik, edep-terbiýe, millilik, watansöýüjilik, jemgyýetde zenanlaryň tutýan orny baradaky gürrüňler esasy orny eýeledi.

Edep-ekramly, ylymly-bilimli, medeniýetli, giň dünýägaraýyşly, watansöýüji, ruhubelent nesilleri ýetişdirmäge uly goşant goşýan bilim işgärleri we ata-eneler jemgyýetimiziň iň hormatlanýan wekilleri bolup durýarlar. Kämil, ilhalar ynasanlary kemala getirmekde olaryň tutýan orny uludyr. Ahlak taýdan berk, ruhy taýdan belent nesiller islendik döwletiň mizemez baýlygydyr. Döwletimizde ähli zat halkyň bähbidine, maşgala abadançylygyna we asudalygyna gönükdirilendir. Her bir raýat öz gezeginde, jemgyýetiň asylly terbiýe işine öz goşandyny goşmaga borçludyr. Terbiýe kämil ýörelgelerden gönezlik alanda, päklik suwundan gandyrylanda, terbiýe daragtynyň miwesi datly bolýar. Şular dogrusyndaky edilen wagyz-nesihatlar ösüp gelýän ýaşlaryň terbiýesinde ähmiýeti uludyr.