Türkmenistanyň milli ýygyndysynyň futbolçylary 10-njy iýunda köpugurly «Aşgabat» stadionynyň merkezi meýdançasynda geçiriljek 2027-nji ýyldaky Aziýa Kubogynyň saýlama ýaryşynyň ikinji tapgyryna taýýarlyk görüp başladylar.
Türkmenistanyň Futbol federasiýasynyň habaryna görä, ýurduň baş toparynyň türgenleşigine 30 futbolçy çagyryldy. Olaryň 23-si oýna gatnaşjaklaryň gutarnykly sanawyna goşular. Tälimçiler toparynyň çözgüdi bilen uzaldylan sanawda Belarusyň «Torpedo-BelAZ» toparynyň ýarym goragçysy Teýmur Çaryýew we Gyrgyzystanyň «Uzgeniniň» hüjümçisi Mihail Titow bar.
Milli ýygyndynyň türgenleşikleri günde iki gezek «Nusaý» stadionynda geçirilýär. Taýýarlyk 9-njy iýuna çenli meýilleşdirilýär we fiziki maşklary, taktiki derňewi we oýun tilsimlerini kämilleşdirmegi öz içine alýar. Türgenleşige milli ýygyndynyň täze baş tälimçisi Röwşen Meredow ýolbaşçylyk edýär. Ol Tailand bilen oýundan iki hepde öň Mergen Orazowyň ornuna geçdi.
Türkmenistanyň we Tailandyň milli ýygyndy toparlary geljekki saýlama duşuşyga «D» toparçanyň öňbaşçylary hökmünde geldiler. Birinji tapgyrda türkmen futbolçylary Hytaý Taýpeýinden 2:1 hasabynda üstün çykdy, Tailand bolsa Şri-Lankany 1:0 hasabynda ýeňdi.
Alty saýlama toparyň ýeňijileriniň ilkinji gezek Saud Arabystanynda geçiriljek 2027 Aziýa Kubogynyň finalyna çykjakdygyny ýatladýarys.
Ondan öň 18 topar 2027 Aziýa Kubogynyň finalyna gatnaşmaga hukuk gazandylar. Olar 2026-njy ýyldaky dünýä çempionatynyň 3-nji tapgyryna gatnaşyjylar: Awstraliýa, Bahreýn, Indoneziýa, Iordaniýa, Yrak, Eýran, Katar, Hytaý, KHDR, Koreýa Respublikasy, Kuweýt, Gyrgyzystan, Birleşen Arap Emirlikleri, Oman, Palestina, Özbegistan, Ýaponiýa we Saud Arabystanydyr (ýaryşyň guramaçysy hökmünde).
Türkmen futbolçylary Aziýa Kubogynyň final tapgyryna iki gezek gatnaşdy. Ilkinji gezek 2004-nji ýylda Hytaýda geçen, ikinji gezek bolsa 2019-njy ýylda Birleşen Arap Emirliklerinde geçen ýaryşa gatnaşdy. Geçen ýaryşda Türkmenistanyň milli ýygyndy topary «E» saýlama toparçada 3-nji ýeri eýeläp, 2023-nji ýylda Katarda geçirilen Aziýa Kubogynyň final ýaryşyna çykyp bilmedi.
Futbol boýunça Aziýa Kubogy ýaryşy dört ýyldan bir gezek geçirilýär. Ol ilkinji gezek 1956-njy ýylda geçirildi. 2007-nji ýyldan bäri ýaryş täk ýyllarda geçirilýär. Aziýanyň häzirki çempiony Katar 2019-njy we 2023-nji ýyllarda iki gezek yklym baýragyny alan topardyr.
