Şu ýyl 70 ýaşy dolan heýkeltaraş Abdymuhammet Oramadowyň eserleriniň şahsy sergisi Türkmenistanyň Medeniýet ministrliginiň Şekillendiriş sungaty muzeýinde geçirilýär.
Sankt-Peterburgyň Ilýa Repin adyndaky çeperçilik akademiýasyny tamamlandan soň, Abdumuhammet Oramadow Bäşim Nuraly adyndaky çagalar çeperçilik mekdebinde mugallym bolup işe başlap, zehinli çagalara heýkeltaraşlyk sungatyny öwretdi. Şol bir wagtyň özünde ol ussatlygyny kämilleşdirdi. 2001-nji we 2011-nji ýyllarda Hytaýa heýkeltaraşlaryň halkara ylmy maslahatyna döredijilik saparlary şunda oňa uly goldaw boldy. Nakgaş Fransiýa, Finlýandiýa, Russiýa, Gazagystan ýaly beýleki ýurtlarda geçirilen sergilere hem gatnaşmak miýesser etdi. Ýöne Hytaý ony iň söýgüli heýkellerini döretmäge ruhlandyrdy.
Häzirki sergide Abdymuhammet Oramadowyň heýkelleriniň kollažlary goýlupdyr, olaryň arasynda «Hormatly» üç metrlik çeperçilik gurluşynyň, şeýle hem häzirki zaman sungat usulynda «Näbelli adam», «Abstraksiýa» heýkelleriniň fotosuratlarynyň ýygyndysy görkezilýär. Bu eserler zalda kiçi göwrümli heýkeller görnüşinde görkezilýär.
Mary welaýatynyň Wekilbazar etrabynda doglan Abdymuhammet Oramadow paýtagtymyzyň taryhy merkezindäki «Ylham» seýilgähinde gurlan ýadygärligiň — orta asyrlaryň meşhur türkmen küştçisi Abu Aly Muhammet As-Suliniň küşt tagtasyndaky döwe syn edip duran heýkeliniň hem awtory. Abdymuhammet Oramadow heýkelleri bilen birlikde şahsy sergisine žiwopis işlerini hem hödürledi. Olaryň arasynda Sankt-Peterburgda geçiren talyp ýyllaryny ýada salýan «Russiýa manzary», şeýle hem mugallym Aleksandr Krawçugyň akademiki usulda çeken «Abdymuhammet Oramadowyň portreti» bar.
Portret žanryndan suratlary hem ünsi özüne çekýär. Şeýle eserleriň biri geň galyp bakýan gyzyň portreti, şeýle hem gözleri uçganaklap duran «Gözel» atly portreti bar.
Abstraksiýa suratkeşiň halaýan usuly. «Başagaýlyk» suratynda ençeme gahrymanyň hiç biri beýlekilere üns bermän, hersi öz işi bilen meşgul. Netijede, bulaşyklyk, alasarmyklyk döreýär.
Şeýle hem Abdymuhammet Oramadowyň «Balyklar durmuşyndan» atly özboluşly eseri aýratyn gyzyklandyrýar. Ýeri gelende aýtsak, nakgaşyň döredijiliginde balyk köp duşýar, ýöne bu eseri aýratyn orun tutýar. Polat çybyklardan ýasalan iş birneme akwariuma meňzeýär, ýöne awtor munuň suwasty jandarlaryň juda dartgynly, çylşyrymly durmuşyny görkezýän ummanyň bir bölegidigini aýdýar.
Abdymuhammet Oramadowyň döredijiligi köptaraply, döwrebap we manyly. Suratkeş käbir wakalary özüçe beýan etmäge çalyşýar. Bu ýeňil iş däl, ýöne Abdymuhammet Oramadow onuň hötdesinden gelýär.
