Lebap welaýatynyň Türkmenabat şäherinde gije-gündiz işleýän taksi çagyrmak hyzmaty işe başlady. Bu başlangyjy «Lebap awtoulag» önümçülik birleşigi «Awtomobil Ulag Hyzmaty» AGPJ bilen bilelikde amala aşyrdy.

Türkmenabat şäheriniň ýaşaýjylary 0655 gysga belgä jaň edip, bu hyzmatdan gije-gündiziň islendik wagtynda peýdalanyp biler. Ýolagçylar üçin elýeterli nyrhlardan ýokary hilli ulag hyzmatlary kepillendirilýär. «Onlaýn taksi» hyzmatynyň esasy aýratynlygy awtomatlaşdyrylan habar beriş ulgamydyr. Ýagny, müşderi sargydy we ulagyň barjak wagtyny tassyklaýan SMS alýar. Bu bolsa ýolagçylar üçin gitmeli wagtyny meýilleşdirmegi aňsatlaşdyrýar we operatoryň jogabyna garaşmak zerurlygyny aradan aýyrýar. Häzirki hyzmatyň Türkmenabatda ýola goýulmagy sebitiň ulag infrastrukturasyny ösdürmekde möhüm ädim boldy.

«Onlaýn taksi» hyzmaty Aşgabatda hem üstünlikli işleýär we şäherde hereket etmegiň amatly hem-de ygtybarly usuly hökmünde özüni görkezdi.