Aşgabatda 17-nji iýunda bellenilýän Çölleşmä we gurakçylyga garşy göreşmegiň bütindünýä güni mynasybetli ýerleriň zaýalanmagynyň bitarap deňagramlylygy ýörelgelerini ýerden peýdalanmak milli meýilnamasyna we syýasatyna goşulyşmak meselelerine bagyşlanan «tegelek stoluň» başynda duşuşyk geçirildi.
Çäre durnukly ösüş boýunça döwletara komissiýasynyň ylmy-maglumat merkezi, Aral deňzini halas etmek boýunça halkara gaznanyň guramasy we Ählumumy ekologiýa gaznasynyň maliýe taýdan goldamagynda Türkmenistanyň Daşky gurşawy goramak ministrligi bilen bilelikde guraldy.
Oňa BMG-niň Çölleşmä garşy göreş Konwensiýasynyň sekretariatynyň, Türkmenistanyň Mejlisiniň, Daşary işler ministrliginiň, Oba hojalyk ministrliginiň, Bilim ministrliginiň, Maliýe we ykdysadyýet ministrliginiň we Döwlet statistika komitetiniň wekilleri gatnaşdylar.
«Tegelek stol» başyndaky duşuşyk ÝZBD ýörelgeleriniň Türkmenistanyň Çölleşmä garşy göreşmek boýunça täzelenýän Milli hereketleriň maksatnamasyna goşulmagyna gönükdirilendir.
Ara alyp maslahatlaşmalaryň dowamynda oňa gatnaşyjylar strategik meýilnamalaşdyrmak we tebigy baýlyklar babatynda dürli milli syýasatlary sazlaşdyrmak meselelerine ünsi çekdiler. Çärä gatnaşanlar ýerden peýdalanmak ulgamynyň häzirki kanuny we institusional esaslaryny, şeýle hem ýerleriň zaýalanmagynyň bitarap deňagramlylygy ýörelgeleriniň ýurtda ýer dolandyryş ulgamyna girizilmegini ara alyp maslahatlaşdylar.
