Grasyň tehniki uniwersitetiniň Elektronika institutynyň elektrotehnika boýunça professory Dewid Pommerenke iş sapary bilen Türkmenistanyň Telekommunikasiýalar we informatika institutyna geldi.
Awstriýaly professoryň türkmen ýokary okuw mekdebine sapary bilelikdäki ylmy barlaglary geçirmegiň mümkinçiliklerini hemmetaraplaýyn öwrenmäge, özara gatnaşyk etmegiň ugurlaryny hem-de iki ýokary okuw mekdebiň arasynda ylym we bilim ulgamynda hyzmatdaşlygyň ileri tutulýan wezipelerini ara alyp maslahatlaşmaga gönükdirilendir.
Gras tehniki uniwersitetiniň inženerçilik we tehnologiýalar, tebigy, takyk we biolukmançylyk ulgamynda Awstriýanyň öňdebaryjy ýokary okuw mekdepleriniň biridigini bellemek gerek. Bu ýokary okuw mekdep QS halkara görkezijisiniň hasaplamalary boýunça dünýäniň iň oňat uniwersitetleriniň hatarynda durýar.
Institutda bolmagynyň dowamynda Dewid Pommerenke talyplar üçin «Elektrostatik zelel» diýen tema boýunça umumy sapak geçdi, şeýle hem ýetişip gelýän hünärmenler bilen gymmatly tejribesini paýlaşdy hem-de talyplaryň ähli sowallaryna giňişleýin jogap berdi. Bu duşuşyk köp babatda statik elektrik barada talyplaryň hünär bilimleriniň baýlaşmagyna, olaryň bu tema boýunça düşünjeleriniň giňemegine hem-de elektron düzümleriň we enjamlaryň elektrostatik akymlaryndan goranmagyň serişdelerini dolandyrmak başarnygyny ösdürmäge ýardam etdi.
Hormatly myhmanyň saparynyň çäklerinde institutda aragatnaşygyň radiotehnologiýalary fakultetiniň radioaragatnaşyk we radiotehniki ulgamlar kafedrasynyň kompýuterler hem-de interaktiw serişdeler bilen enjamlaşdyrylan «Antenna-fider enjamlar» barlaghanasynda netijeli duşuşyk geçdi. Çäre oňa gatnaşyjylara peýdaly tejribeleri alyşmaga hem-de bu ulgamda iň täze ylmy gazanylanlary ara alyp maslahatlaşmaga mümkinçilik berdi.
Barlaghanada «Sanly telewideniýe», «Sanly hemra ýaýlymy», «Sanly teleýaýlym ulgamlary», «Hemra aragatnaşyk ulgamlarynda radio torlarynyň taslamasyny düzmek», «Hemra we radio ýaýlym ulgamlary» ýaly dersler boýunça amaly we synag okuwlarynyň hilini ýokarlandyrmak babatda yzygiderli işleriň alnyp barylýandygy bellenildi. Radiotehniki ulgamlaryň nusgalaryny we maglumat geçiriji enjamlary çuňňur öwrenmek, ylmy taýdan barlamak we işläp taýýarlamak maksady bilen bu ulgamda ýokary netijeleri gazanmak üçin dürli çäreler yzygiderli geçirilýär.
Talyplar we mugallymlar daşary ýurtly alyma radiogeçiriji we radiokabul ediji enjamlaryň, radioaragatnaşyk ulgamlarynyň işleýiş usullaryny beýan edýän synag nusgalaryny görkezdiler, şeýle hem degişli tanyşdyrmalary bilen çykyş etdiler. Institutyň wekilleriniň ylmy işleri uly gyzyklanma döretdi hem-de professoryň ýokary bahasyna mynasyp boldy. Dewid Pommerenke çykyş edenlere hoşallyk bildirip, ylmy pikirleri hem-de radioaragatnaşyk we elektronika ulgamynda taslamalary gowulandyrmak hem-de döwrebaplaşdyrmak boýunça käbir tekliplerini berdi.
Paýtagtymyzyň ýokary okuw mekdebinde Gras tehniki uniwersitetiniň Elektronika institutynyň professorynyň kabul edilmeginiň dowamynda taraplar hyzmatdaşlygy ösdürmegiň geljegini ara alyp maslahatlaşdylar we netijeli gatnaşyklary geljekde ösdürmäge özara gyzyklanma bildirýändiklerini beýan etdiler. Türkmenistanda öňdebaryjy dünýä tejribesiniň öwrenilmegine hem-de daşary ýurtly hyzmatdaşlar bilen netijeli gatnaşyklaryň ösdürilmegine uly ähmiýet berilýändigi, düýpli nazary we amaly ylmy barlaglar ulgamynyň giňelýändigi, alymlaryň netijeli işlemekleri üçin zerur şertleriň döredilýändigi, bilimiň, ylmyň we önümçiligiň özara arabaglanyşygyna aýratyn üns berilýändigi nygtaldy.
