Türkmenistanyň wekiliýeti tejribe alyşmak we seýsmologiýa pudagyndaky ýaş hünärmenleriň hünärlerini ýokarlandyrmak üçin Özbegistan Respublikasynda saparda boldy.

Sapar Türkmenistanyň Ylymlar akademiýasynyň Seýsmologiýa we atmosferanyň fizikasy instituty bilen bilelikde Birleşen Milletler Guramasynyň Ösüş maksatnamasy (BMGÖM) tarapyndan durmuşa geçirilýän «Seýsmiki töwekgelçiliklere baha bermek, ýer titremeleriniň öňüni almak we olara seslenmek üçin Türkmenistanyň milli kuwwatyny güýçlendirmek» taslamasynyň çäklerinde guraldy.

Wekiliýetiň agzalary Daşkentiň seýsmiki obserwatoriýasyna baryp, ýer titremesi baradaky maglumatlary ýazga almak we işlemek üçin awtomatlaşdyrylan ulgamlary ornaşdyrmak mümkinçiligini ara alyp maslahatlaşdylar.

 Özbegistanyň Adatdan daşary ýagdaýlar ministrliginiň seýsmiki çaklamalara gözegçilik merkezi seýsmiki işjeňligi çaklamak we adatdan daşary ýagdaýlara çalt seslenmek usullaryny ulanmak boýunça tejribe alşyldy.

Saparyň jemi boýunça Özbegistan Respublikasynyň Ylymlar akademiýasynyň G.A.Mawlýanow adyndaky seýsmologiýa instituty bilen ýer titremeleriň tebigaty babatda bilelikdäki ylmy barlaglary geçirmek boýunça hyzmatdaşlyk hakyndaky Ähtnama gol çekmek barada ylalaşyk gazanyldy.

Hyzmatdaşlygyň geljegi uly meýilnamalarynyň arasynda ýaş hünärmenler üçin iş tejribelerini guramak, şeýle hem ylmy maslahatlary geçirmek göz öňünde tutulýar.