27–31-nji iýunda Daşkentde çeper gimnastika boýunça «Şadyýan kerwen -2025» (Happy Caravan 2025) atly XV halkara çagalar ýaryşy geçirildi. Bu abraýly ýaryşa özbegistanly, gazagystanly, russiýaly, gyrgyzystanly, hindistanly we türkmenistanly toparlar gatnaşdylar.

Türkmenistanyň çeper gimnastika boýunça milli ýygyndy toparynyň baş tälimçisi Fiza Aýwazowanyň ýolbaşçylygynda 7-13 ýaş aralygyndaky türkmen gimnastikaçylary 17 altyn, 11 kümüş we 5 bürünç medal gazanyp, ýokary ussatlyk görkezdiler. Bu ajaýyp üstünlik tutanýerli türgenleşigiň we ýaş türgenleriň zehininiň netijesi boldy.

Ýaryşda gimnastikaçylaryň ýanynda tälimçiler Rabiga Hudaýberdiýewa (Aşgabat), Irina Kostandýan (Balkan welaýaty) we Ýelena Ustimowa (Aşgabat) dagylar boldy.

Rabiga Hudaýberdiýewanyň şägirtleri bir medal toplumyny gazandylar:

Aýsel Tagyýewa (2015-nji ýylda doglan) – 1-nji ýer (halka we top);

Melike Annamyradowa (2016-njy ýylda doglan) – 1-nji ýer (halka);

Agniýa Karýaşkina (2016-njy ýylda doglan) – 1-nji ýer (halka);

Aýsenem Nazarowa (2016-njy ýylda doglan) – 2-nji ýer (halka);

Kseniýa Kuznetsowa (2013-nji ýylda doglan) – 2-nji ýer (top we bulawalar);

Angelina Maslennikowa (2012-nji ýylda doglan) – 2-nji ýer (halka we bulawalar);

Amira Işangulyýewa (2012-nji ýylda doglan) – 3-nji ýer (halka we bulawalar).

 – Ýaryşa Türkmenistandan 33 türgen gyz gatnaşdy. Bular sportuň iň ajaýyp görnüşleriniň biriniň geljegi örän uly ýaş wekilleridir. Olaryň geljegine uly umyt baglanýar. Özbegistana sapar olar üçin bäsdeşlik ruhuny özleşdirmäge we psihologik päsgelçilikleri ýeňip geçmäge gönükdirilen örän möhüm synag boldy. Ýetip gelýän ýaryşy göz öňünde tutmak bilen, türgenleşikler güýçlendirilen depginde geçirildi. Ýaş türgenler ýaryşlarda halkalar, toplar, bulawalar bilen çykyş etdiler we bu görnüşleriň doly hötdesinden geldiler – diýip, tälimçi Rabiga Hudaýberdiýewa belledi.

Bäsleşik medallary, diplomlary we gymmatly sowgatlary dabaraly ýagdaýda gowşurmak bilen tamamlandy.