Türkmenistanyň Jemgyýetçilik guramalarynyň merkeziniň edara binasynda Halkara parahatçylyk we ynanyşmak ýyly hem-de Türkmenistanyň Garaşsyzlygynyň 34 ýyllygy mynasybetli «Gülüň owadan!» atly bäsleşigiň jemleýji tapgyry geçirildi. Ol Türkmenistanyň Zenanlar birleşiginiň Merkezi geňeşi, Kärdeşler arkalaşyklarynyň Milli merkezi hem-de ÝUNESKO-nyň işleri barada Türkmenistanyň milli toparynyň Sekretariaty bilen guraldy. Bäsleşigiň jemleýji tapgyryna Aşgabat, Arkadag şäherlerinde we welaýatlarda geçirilen bäsleşigiň deslapky tapgyrlarynda ýeňiji bolan zenanlarymyz gatnaşdylar.

Bäsleşigiň birinji şertine görä zenanlar türkmen milli keçesini taýýarlamak bilen baglanyşykly işleri ýerine ýetirip görkezdiler we keçäni taýýarlamak üçin zerur bolan gurallaryň atlary, ulanylyşy barada gürrüň berdiler. Soňra gatnaşyjylar öz welaýat aýratynlyklaryna görä, gadymy milli nagyşlary «Ak tüýnük», «Gyzyl tüýnük», «Gözenek», «Saýlan», «Gülýaýdy», «Sekiz goçak», «Gelinbarmak», «Gapyrga», «Öküz oňurga», «Gonjuk», «Hindi goçak», «Içýanagzy», «Tazy guýruk», «Saýlap», «Barmak» we başga gülleri salyp keçe güllediler.

Bäsleşigiň soňky şertine laýyklykda, gözellik sungaty bolan keçe bilen baglanyşykly taryhy maglumatlary, yrymlary, nagyşlarynyň, gülleriniň taryhyndan gürrüň berýän gadymy rowaýatlary, degişmeleri, gazallary, aýdyşyklary hem-de Berkarar döwletiň täze eýýamynyň Galkynyşy döwrüni wasp edip, öz ýürek buýsançlaryny şahyrana setirleriň we çeper sahnalaryň üsti bilen ýerine ýetirdiler.

Bäsleşik örän çekeleşikli geçdi. Onuň ahyrynda eminler toparynyň gelen netijesine görä:

Baş baýraga Daşoguz welaýatynyň Daşoguz şäherindäki daşary ýurt dillerine ýöriteleşdirilen 25-nji orta mekdebiň başlangyç synp mugallymy Ýazbibi Mämedowa, Daşoguz welaýatynyň Daşoguz şäherindäki 30-njy çagalar bakja-bagynyň terbiýeçisiniň kömekçisi Sülgünjemal Potyýewa;

Birinji orna Mary welaýatynyň Mary etrabynyň Jemgyýet geňeşliginiň ýaşaýjysy Bossan Şiriýewa, Mary welaýatynyň Ýolöten etrabyndaky 32-nji orta mekdebiň matematika mugallymy Güljahan Ýazlyýewa;

Arkadag şäherindäki iňlis dili dersine ýöriteleşdirilen 3-nji orta mekdebiň başlangyç synp mugallymy Güljan Öweznepesowa, Arkadag şäheriniň Taryhy we ülkäni öwreniş muzeýiniň muzeý gymmatlyklaryny hasaba almak, saklamak bölüminiň ylmy işgäri Akgül Gurbanmämmedowa;

Ikinji orna Lebap welaýatynyň Saýat etrabynyň «Awçy» geňeşligindäki oba medeniýet öýüniň medeni çäre guramaçysy Laçyn Rejepgulyýewa, Lebap welaýatynyň Halaç etrabynyň Çagalar we ýetginjekler öýüniň gurnak ýolbaşçysy Mähri Ahmedowa;

Üçünji orna Ahal welaýatynyň Babadaýhan etrabynyň Akwekil obasyndaky Taryhy we ülkäni öwreniş muzeýiniň gürrüň berijisi Gülşat Daňatarowa, Ahal welaýatynyň Tejen etrap medeniýet bölüminiň Taryhy we ülkäni öwreniş muzeýiniň ylmy işgäri Selbi Annakurbanowa;

Türkmenistanyň Döwlet medeniýet merkeziniň Döwlet muzeýiniň Tebigat we ülkäni öwreniş muzeýi bölüminiň müdiriniň orunbasary Güljemal Annamyradowa, Türkmenistanyň Döwlet medeniýet merkeziniň Döwlet muzeýiniň Muzeý gaznasynyň elektron binýadyny guramak we pasportlaşdyrmak bölüminiň gaznalary goraýjysy Amangül Gurbanowa;

Balkan welaýatynyň Esenguly etrabynyň Çekişler geňeşliginiň Geňeşiniň hünärmeni Rejepbibi Sapargylyjowa, Balkan welaýatynyň Esenguly etrap hassahanasynyň saglyk öýüniň kiçi şepagat uýasy Gülnara Hajyýewa mynasyp boldular.

Bäsleşigiň dowamynda aýdym-sazlar belentden ýaňlandy. Ýeňiji bolanlara Hormat hatlary we gymmat bahaly sowgatlary gowşuryldy.