7 – 8-nji sentýabr gijesinde Türkmenistanyň ýaşaýjylary, Ýeriň köp bölegi ýaly, täsin astronomiki hadysany – Aýyň doly tutulmagyny synladylar.

Ýeriň kölegesiniň Aýyň ýüzüni doly örtmegi netijesinde ol garamtyl mis-gyzyl reňkine meňzeş öwüşgin aldy. Bu tutulyşy ýerli wagt boýunça agşam sagat 22:00 töwereginde synlamak mümkin boldy. Ýurdumyzyň ýaşaýjylary bu hadysany öýleriniň penjiresinden we dürli şäherleriň hem-de etraplaryň köçelerinden synladylar. Köp adamlar öz suratlaryny sanly ulgamlarda paýlaşdylar.

Aý tutulma hadysasy, Ýer Gün bilen Aýyň arasyndaky çyzykda ýerleşende, ýagny Aý Ýeriň kölegesine düşende ýüze çykýar. Aýyň gyzyl öwüşgini bolsa, Gün şöhlesiniň Ýeriň atmosferasynda döwülmegi netijesinde emele gelýär. Tutulmagyň doly pursatdaky ýagdaýy 1 sagat 22 minut dowam edip, tutuş hadysa 5 sagatdan gowrak wagt dowam etdi.

Gün tutulyşy bilen deňeşdirilende, Aý tutulyşyna ýörite enjamlar bolmazdan seredip bolýar. Ony göz bilen, şeýle-de dürbi, teleskop ýa-da fotoapparat arkaly görmek mümkin boldy.