Türkmenistanyň çempiony we 2024-2025 AFK-nyň Çagyryş ligasynyň ýeňijisi «Arkadag» futbol topary şu gün 2025-2026 AFK-nyň 2-nji Çempionlar ligasynyň toparçalaýyn tapgyrynda ilkinji duşuşygy bolar. Bu onuň Aziýanyň ähmiýeti boýunça ikinji uly topar ýaryşynda ilkinji gezek çykyşy bolar. Adybir Arkadag şäheriniň sport topary Özbegistanyň «Andijon» futbol topary bilen duşuşar.
Toparçalaýyn ýaryşyň başlamagynyň öňüsyrasynda «Arkadag» topary PRO derejeli tälimçisi bolan Röwşen Muhadowyň adyny baş tälimçi hökmünde AFK-nyň 2-nji Çempionlar ligasynyň ýaryşyna gatnaşmak üçin yglan etdi.
Toparlaryň tälimçileri, öňýany geçirilen metbugat ýygnagynda «Altyn asyr» elektron gazetiniň habarçysynyň soraglaryna jogap berende, öňde duran duşuşykdan nämä garaşýandyklaryny aýtdylar.
«Arkadag» futbol toparynyň baş tälimçisi Röwşen Muhadow:
«Garşydaşymyz barada aýdanymyzda, Özbegistanyň çempionatyndaky çykyşlaryna esaslanyp, «Andijon» toparynyň güýçli we gowşak taraplaryny öwrendik we garalan wideo ýazgylarymyza esaslanyp, taýýarlyk strategiýasyny taýýarladyk.
Ýetip gelýän duşuşyk köp sanly janköýerlerimiz üçin uly baýram, şonuň üçin-de biz olary oňyn netijeler bilen begendirmäge çalşarys. Geçen ýyl «Arkadag» topary Türkmenistanyň öňdebaryjy hünäri futbol topary hökmünde öz öňünde ýokary wezipe goýdy – ol 2024-2025 AFK-nyň Çagyryş ligasynda ýeňiş gazandy. Bu möwsümde-de, ejiz toparlaryň ýok ýerinde, ýagny AFK-nyň 2-nji Çempionlar ligasynda hut şu derejede çykyş etjekdigimize ynandyrmak isleýärin. Bu bäsleşige Saud Arabystanynyň «Al-Nasr» toparynyň gatnaşýandygyny, onuň düzüminde bolsa dünýäniň iň adygan futbolçylarynyň biri, Ýewropanyň çempiony we 5 sany «Altyn top» baýragyny gazanan Kriştianu Ronaldonyň oýnaýandygyny göz öňünde tutmalydyrys.
Özbek topary bilen boljak duşuşygyň ýeňil düşmejegini bilýäris, ýöne biz ýeňiş üçin elimizden gelenini ederis. «Arkadag» topary duşuşyga doly diýen ýaly taýyn. Mümkin, «Andijon» toparyna garşy duşuşykda oýunçylaryň dogry çalşyrylmagy-da möhüm rol oýnar. Umuman, biz öz güýjümize ynanýarys».
«Andijon» futbol toparynyň baş tälimçisi Maksim Şaskih:
«Dört toparyň ählisiniň-de maksady bir – AFK-nyň 2-nji Çempionlar ligasynyň 1/8 finalyna çykmak. Türkmenistanyň çempiony bilen boljak duşuşykda biz şu maksada tarap hereketimizi dowam etdireris. «Arkadag» topary Aziýanyň futbol sahnasynda täze topar, emma eýýäm gaty jebis we bäsleşige ukyply topar.
Duşuşyga taýýarlygyň çäginde biz «Arkadag» toparynyň öňki duşuşyklaryny, şol sanda AFK-nyň Çagyryş ligasyndaky oýnuny-da derňäp, garşydaşymyz barada mümkin boldugyça köp maglumat ýygnadyk. Şeýle hem, köpüsiniň Türkmenistanyň ýygyndy toparynyň agzalary bolan oýunçylara garşy oýnajakdygymyza düşünýäris, şonuň üçin-de garşydaşlarymyza çynlakaý garaýarys.
Toparçalaýyn tapgyryň birinji duşuşygyna taýýarlanmaga wagtymyz ýeterlik boldy, bu duşuşyk ýiti, gyzykly, ýokary hilli we çalasyn oýun bolar diýip, umyt edýärin. Biz duşuşygyň şunuň ýaly bolmagy üçin jan ederis. Biz Türkmenistana oňyn netije gazanmak üçin geldik, şonuň ugrunda-da göreşeris».
Görşümiz ýaly, iki toparam duşuşyga çynlakaý çemeleşýär. Diýmek, topardaky ilkinji utuklar ugrunda gaýduwsyz göreşmeli bolar. Bizem Türkmenistanyň çempionyna täze möwsümdäki ilkinji halkara duşuşygynda üstünlik arzuw edýäris.
«Arkadag» bilen «Andijon» toparlarynyň duşuşygy Arkadag şäherindäki stadionda sagat 18:45-de başlanar.
