Türkmenistanyň Oguz han adyndaky Inžener-tehnologiýalar uniwersitetinde onuň halkara ähmiýetli üstünlik gazanmagy – ýokary okuw mekdebiň «THE Awards Asia 2026» atly abraýly baýragyň iň gowy uniwersitetleriň sekizligine girizilmegi mynasybetli dabaraly maslahat geçirildi.
Bu habar 20-nji ýanwarda «Times Higher Education» (THE) diýen abraýly britan neşiriniň we guramasynyň resmi saýtynda ýerleşdirildi. Bu gurama dünýäniň ýokary okuw mekdeplerine olaryň alyp barýan işleriniň ähli ugurlary boýunça baha berýär. Neşiriň ýerleşdiren maglumatlaryna görä, Türkmenistanyň Oguz han adyndaky Inžener-tehnologiýalar uniwersiteti «Ýokary bilimiň Oskary» hökmünde giňden tanalýan iň abraýly halkara baýraklarynyň biri bolan «THE Awards Asia 2026» baýragynyň «Ýylyň STEM ylmy-taslamasy» diýen ugry boýunça iň gowy uniwersitetleriň öňdebaryjylarynyň sanawyna girdi.
Dabaraly maslahatyň dowamynda bellenilişi ýaly, bu waka uniwersitetiň özi üçin bolşy ýaly, umuman, tutuş ylmy jemgyýetçilik üçin hem hakykatdan-da ajaýyp waka boldy. Şunda bu baýragyň çäklerinde uniwersitet ýokary netijeleri ikinji gezek görkezdi – geçen ýyl ol «Talyplary çekmek boýunça ýylyň möwsümi» ugry boýunça Merkezi Aziýada ilkinji bolup, iň gowularynyň 8-ligine girdi.
Şu ýyl Aziýanyň 500-den gowrak ýokary okuw mekdebi baýrak ugrunda dalaşgärlik etdiler. Olar 10 ugur boýunça bäsleşige gatnaşdylar. Ahyrky netijede, şolardan iň gowularynyň 80-si (her ugur boýunça 8-si) saýlanylyp alnyp, olar 17 ýurda hem-de çäklere wekilçilik etdiler. Şu sanawa Ýaponiýa, Singapur, Günorta Koreýa, Tailand, Malaýziýa, Türkiýe, Hindistan we Gonkong ýaly tehnologik taýdan ösen ýurtlaryň iň gowy uniwersitetleri girdiler.
Bu sanawdan orun alan Türkmenistanyň Oguz han adyndaky Inžener-tehnologiýalar uniwersitetiň ajaýyp üstünligi Türkmenistanda ylmyň we tehnologiýalaryň yzygiderli we durnukly ösdürilýändiginiň aýdyň subutnamasy boldy. Uniwersitetiň ýaş alymlary tarapyndan taýýarlanylan «Howply galyndylary ýokary derejedäki arassa gipse öwürmek: durnukly materiallary öwrenmek ylmynda täze öwrülişik» atly ylmy işi dünýäniň bilermenleriniň ünsüni çekdi.
Maslahatda Malaýziýanyň Ýaş alymlar assosiasiýasynyň (MYSO) prezidenti Razmi bin Abdul Razak uniwersiteti gazanan uly üstünligi bilen gutlady hem-de türkmen talyplarynyň ylmy kuwwatyna ýokary baha berip, geljekde netijeli hyzmatdaşlyk etmäge giň mümkinçilikleriň bardygyny belledi.
Soňra Ýaponiýanyň nanolukmançylyk we innowasiýalar merkeziniň (iCONM) ählumumy hyzmatdaşlyk boýunça baş utgaşdyryjysy, doktorantura boýunça baş ylmy işgäriniň orunbasary Sabina Kuader sanly ulgam arkaly çykyş etdi. Alym «Nanolukmançylykda emeli aňyň ulanylmagy» diýen tema boýunça mazmunly çykyş edip, soňra Türkmenistanyň Oguz han adyndaky Inžener-tehnologiýalar uniwersiteti bilen bu ulgamda hyzmatdaşlyk etmegiň mümkinçilikleri we geljegi barada gürrüň berdi.
Maslahatyň dowamynda «THE Awards Asia 2026» baýragyna üstünlikli wekilçilik eden ylmy taslamanyň ýolbaşçysy çykyş etdi. Ol çykyşynda fosfogips galyndylaryny gaýtadan işlemegiň we ýokary derejede arassa gipsi almagyň innowasion usullary barada, şeýle hem 2025-nji ýylda bu taslamanyň halkara bäsleşiklerde mynasyp bolan altyn medallary dogrusynda giňişleýin gürrüň berdi.
Soňra çärä gatnaşyjylaryň öňünde ýaş alymlar we talyplar – ylmy taslamalar boýunça halkara bäsleşikleriň ýeňijileri hem-de uniwersitetiň professorlary çykyş etdiler. Çykyşlarda ýaşlaryň ylmy kuwwatyny, olaryň zehinlerini we ukyplaryny ösdürmek, şeýle hem halkara bäsleşiklere we taslamalara üstünlikli gatnaşmak we olarda ýokary netijeleri gazanmak üçin ýurdumyzda döredilen häzirki zaman şertler hem-de giň mümkinçilikler barada buýsanç hem-de hoşallyk bilen aýdyldy.
