Ýurdumyzda 8, 10, 12, 14, 16 we 18 ýaş toparlaryndaky oglan-gyzlaryň arasynda nusgawy küşt boýunça Türkmenistanyň birinjiligi ugrundaky ýaryşyň ýeňijileri kesgitlendi. Aşgabadyň Ýöriteleşdirilen küşt we şaşka mekdebinde geçirilen bu bäsleşige ýurdumyzyň ähli welaýatyndan takmynan 500 töweregi ýaş türgen gatnaşdy.
76 küştçiniň birinjilik ugrunda bäsleşen iň kiçi, 8 ýaşly toparynda Aşgabadyň Ýöriteleşdirilen küşt we şaşka mekdebiniň okuwçysy Kerim Babaýew güýçli başlangyç taýýarlyklary netijesinde mümkin bolan 9 utukdan 8 utuk gazanmak bilen ýeňiji boldy. Lebap welaýatyndan Begmyrat Agamämmedow ondan ýarym utuk yza galdy. Ýedi utuk toplan lebaply Hangeldi Myradow bolsa bürünç medala mynasyp boldy.
36 küştçiniň gatnaşan 8 ýaşa çenli gyzlaryň arasyndaky birinjilik ugrundaky ýaryş Lebap welaýatynyň wekilleriniň arasynda ýaýbaňlandy. Bu ýerde geçen ýyl 7 ýaşa çenli toparda çempion bolan Merýem Rüstemowa mümkin bolan 9 utukdan 8 utuk toplap, ýeňiji boldy. Birinjilik derejesini oňa goşmaça görkezijiler boýunça Laçyn Isaýewa giderdi. Üçünji orny 6,5 utuk toplan Çynar Pirgulyýewa eýeledi.
82 küştçiniň bäsleşen 10 ýaşa çenli oglanlaryň arasyndaky çempionlyk ugrundaky ýaryş doganlar Çaryýewleriň arasynda bolup geçdi. Olaryň kiçisi Çaryhekim özünden bir ýaş uly topardaky doganyny yzly-yzyna üçünji ýyl 8 utuk bilen utup, ýeňiş gazandy. Kümüş medal alan Halylmuhammet inisinden ýarym utuk asgyn geldi. Bürünç medala bolsa 7 utuk gazanan Mary welaýatyndan Azat Sapardurdyýew mynasyp boldy.
10 ýaşa çenli gyzlaryň toparynda «Iň ökde küştçi» diýen at ugrunda 34 küştçi bäsleşdi. Bu ýerde öň 9 ýaşa çenli toparda ýeňiş gazanan lebaply Bägül Jumaýewa 7,5 utuk bilen birinji orny eýeledi. Sekiz ýaşa çenli gyzlaryň arasynda geçen dünýä çempionatynda bürünç medal gazanan Mary welaýatyndan Anna Çaryýewa bolsa 7 utuk bilen ýaryşyň tertip sanawynda ikinji orna düşdi. Goşmaça görkezijiler boýunça üçünji orny Aşgabadyň Ýöriteleşdirilen küşt we şaşka mekdebiniň okuwçysy Enejan Çarygeldiýewa eýeledi.
67 küştçiniň gatnaşmagynda geçen 12 ýaşa çenli oglanlar toparynda lebaply Nazar Narymanow bilen daşoguzly Omarbek Ysmaýylowyň her biri 7,5 utuk toplady. Olaryň özara duşuşygynyň netijesi boýunça, Nazar ilkinji gezek ýurdumyzyň çempiony boldy. Öňdäki üçlügiň soňky setirini 7 utugy bolan lebaply Azat Rejepow eýeledi.
12 ýaşa çenli gyzlar toparynda 27 küştçiniň arasynda geçen ýaryşda mümkin bolan 9 utukdan 8,5 utuk toplan lebaply Aýýa Baýramowa ýeňiş gazandy. Daşoguzly Dilber Hupbyýewa ondan ýarym utuk yza galdy. Aşgabadyň Ýöriteleşdirilen küşt we şaşka mekdebiniň okuwçysy Zalina Iminowa 6 utuk bilen üçünji orny eýeledi.
Iň bäsdeşlikli toparda, ýagny 14 ýaşa çenli oglanlar toparynda 48 küştçiniň gatnaşmagynda geçirilen ýaryşda Aly Ahmedow bir oýun hem utulman ýeňiş gazandy. Ol dokuz oýunda 7,5 utuk toplap, ikinji orundaky maryly Emir Amanmuhamedowdan ýarym utuk öňe geçdi. Ýaryşyň köp böleginde 6,5 utuk bilen öňdeligi elde saklap gelen Mary welaýatynyň küşt mekdebiniň uçurymy Alyhan Batyrow bolsa, sekizinji tapgyrdaky utulyşdan soň bürünç medal bilen kanagatlanmaly boldy.
Gyzlaryň 14 ýaşa çenli toparynda «Küşt Älemi» küşt akademiýasyndan Nurana Söýünowa 29 bäsdeşiň arasynda 8,5 utuk bilen ynamly ýeňiş gazandy we görkezijisindäki 200 utuk tapawudyň tötänden däldigini subut etdi. Ikinji we üçünji orunlary degişlilikde lebaply Nurhan Babanazarowa (7,5 utuk) we Nebahat Myradowa (6,5 utuk) dagy eýeledi.
16 ýaşa çenli oglanlar toparynda 35 küştçiniň arasynda birinji ýeri 8 utuk gazanan, Aşgabadyň Ýöriteleşdirilen küşt we şaşka mekdebiniň okuwçysy Aşyrmuhammet Ataýew eýeledi. Ol ozal 17 ýaşa çenli toparda ýeňiş gazanypdy. Ol öz artykmaçlygyny, esasan, şu ýyl Türkmenistanyň çempionatynyň Ýokary ligasynda çykyş etmek hukugyny gazanan Gurbanmyrat Rüstemowy ýeňmegi bilen subut etdi. Mary welaýatyndan Ahmet Artykow we Lebap welaýatyndan Gurbanmyrat Rüstemow her biri 7,5 utuk toplady. Şeýle-de bolsa, goşmaça görkezijiler boýunça, A.Artykow kümüş medal, G.Rüstemow bolsa bürünç medal gazandy.
Çempionlyk at ugrunda 17 küştçiniň bäsleşen 16 ýaşa çenli gyzlar toparynda altyn medal ugrundaky bäsleşikde lebaply Jahan Rejebowa (häzirki çempion) bilen geçen ýylyň şu topar boýunça çempiony Mähri Agamyradowanyň arasynda ýaýbaňlandy. Olaryň şahsy duşuşygy deňme-deň tamamlandy we, netijede, ýaryşyň başynda goýberen ýalňyşy sebäpli, Mähri birinji orundaky Jahandan ýarym utuk asgyn gelip, 8 utugy bilen ikinji orna kaýyl bolmaly boldy. Üçünji baýrakly orny 6 utuk bilen Aşgabadyň Ýöriteleşdirilen küşt we şaşka mekdebinden Arzygül Muhamowa eýeledi.
Iň uly ýaş toparynda, ýagny 2008-nji ýylda doglan köp sanly güýçli lebaply küştçüleriň 18 ýaşa çenli ýaş toparynda 27 bäsdeşiň arasynda geçen ýaryşda altyn medalyň ykbalyny Buhgolsyň kesik koeffisiýenti kesgitledi. Bu koeffisiýent Şageldi Gurbandurdyýewde iň ýokary bolup (8 utuk), çempion boldy. Şonça utuk gazanan Sanjar Gaýbullaýew bolsa ikinji orny eýeledi. Üçünji orny bolsa Lebap welaýatynyň küşt mekdebiniň 7,5 utuk gazanan başga bir wekili Serdar Baýramow eýeledi.
13 küştçiniň gatnaşan 18 ýaşa çenli zenanlar toparynda tutuş ýaryşyň ýeke-täk şeksiz ýeňijisi Mary welaýatyndan Jennet Ýalkanowa boldy. Ol mümkin bolan 9 utukdan 9 utuk toplap, iň ýakyn bäsdeşi, Aşgabadyň Ýöriteleşdirilen küşt we şaşka mekdebiniň okuwçysy Mährijemal Gurbangeldiýewadan 2,5 utuk öňe saýlandy. Lebaply Mähri Aýmakowa 6,5 utuk bilen bürünç medala mynasyp boldy, ol ikinji orun üçin bäsleşikde goşmaça görkezijiler boýunça asgyn geldi.
Jübüt ýaş toparlary boýunça birinjilik ugrundaky ýaryş milli saýlaw ulgamynyň esasy tapgyrydyr. Bäsleşikleriň netijeleri boýunça, milli ýygyndy topar Halkara küşt federasiýasynyň (FIDE) we Aziýanyň küşt federasiýasynyň (ACF) howandarlygyndaky halkara ýaryşlarda Türkmenistanyň adyndan çykyş etjek ýygyndy toparyň düzümi saýlanar.
Şeýle ýaryşlaryň geçirilmegi küşt oýnunyň çagalaryň arasynda hem giňden ýaýramagyna, ösüp barýan ýaş nesilde logiki we strategik pikirlenişiň ösmegine hem ýurdumyzyň ýaşlarynda intellektual mümkinçilikleriň döremegine ýardam edýär.
