Türkmenistanyň ýokary okuw mekdepleriniň talyplary üçin täze okuw kitaplary neşir edildi. «Gurluşyk konstruksiýalary» atly okuw kitaby B.Mämmedow we D.Durdyýew tarapyndan taýýarlanyp, «Ylym» neşirýaty tarapyndan çap edildi.

Neşirde metal, agaç we demirbeton konstruksiýalarynyň ösüş taryhy, olaryň ulanylyş ugurlary, fiziki-mehaniki häsiýetleri hem-de konstruktiw çyzgylary barada giňişleýin maglumat berilýär. Hasaplamagyň we dizaýnyň esaslaryna, konstruksiýalary birleşdirmegiň usullaryna, şeýle hem göteriji we berkidiji elementleri hasaplamagyň usullaryna aýratyn üns berildi.

Okuw kitaby inžener-gurluşyk hünärleriniň talyplaryna, mugallymlaryna, şeýle hem bu ugurda ylmy-barlag işleri bilen meşgullanýan aspirantlara niýetlenendir.

G.Esenamanowyň «Ýokary matematika (köp üýtgeýän funksiýalar, differensial deňlemeler, gatlaýyn we egriçyzykly integrallar, hatarlar)» atly täze okuw gollanmasy Türkmen döwlet neşirýat gullugy tarapyndan çap edildi.

Gollanma häzirki zaman bilim ýörelgelerine laýyklykda düzüldi: her bölüm gysgaça nazary maglumatlardan – esasy kesgitlemelerden we formulalardan başlanýar, soňra bolsa jikme-jik düşündirilen mysallar we meseleler berilýär. Esasy üns meseleleri çözmegiň usullaryny amaly taýdan özleşdirmäge, şeýle hem talyplaryň özbaşdak işine gönükdirilýär. Gollanmada her bölümiň ahyrynda jogaplary bilen meseleler ýerleşdirilendir.

Gollanma esasynda okatmak häzirki zaman kompýuter tehnologiýalaryny, hususan-da, meseleleri çözmek we wizuallaşdyrmak üçin Maple ulgamyny giňden ulanmagy göz öňünde tutýar.

Okuw gollanmasy ýokary matematika, matematiki analiz, differensial deňlemeler, programmirleme we hasaplaýyş usullaryny öwrenmekde ulanylyp, geljekki hünärmenleriň bilim derejesini ýokarlandyrmaga we taýýarlygynyň hilini ýokarlandyrmaga ýardam berýär.