Türkmenistanyň şekillendiriş sungaty muzeýiniň Sergiler merkezinde türkmen suratkeşleriniň işleriniň medeniýet we sungat işgärleriniň hem-de Magtymguly Pyragynyň şygryýet güni mynasybetli «Medeniýet we sungat – Magtymguly Pyragynyň göwün çyragy» atly gala-sergisi açyldy.
Serginiň açylyş dabarasynda Türkmenistanyň Suratkeşler birleşiginiň ýolbaşçysy Çarymyrat Ýazmyradow ýurdumyzyň medeniýet durmuşyna işjeň gatnaşan we ýiti zehinini görkezen 65 sany suratkeşe gymmat bahaly sowgatlary gowşurdy. Şeýle şatlykly başlangyçdan soňra myhmanlar ussatlaryň öz hünär baýramçylygy mynasybetli döreden gymmatlyklary bilen tanyşdylar.
Sylaglanan suratkeşleriň biri hem Rahman Umarowdyr. Ol sergä Magtymguly Pyragynyň keşbi şekillendirilen triptihi hödürledi. Her şahyryň öz Magtymgulysy bar. Rahman Umarow üçin ol orta ýaşly, akylly keşpli, gamgyn gözli adam. Suratda beýlekilerden tapawutlylykda gyzyl reňk köp. Bu bolsa şahyra we raýata mahsus bolan dogruçyllygyň alamatydyr.
Türkmen nusgawy şygryýetini Gunça Myradowa düýbünden başga şekilde görkezdi. Suratkeş şahyry ýaş ýigit keşbinde suratlandyrypdyr. Onuň suratynda Magtymgulynyň bakyşy özüne ünsi çekýär. Ýaş şahyr geljekde özüne nähili ykbalyň garaşýanyny bilýän ýaly.
«Magtymguly» ady bilen iki sany suraty Meýlis Ataýew sergä hödürledi. Ikisi hem ýumşak reňklerde ýerine ýetirilipdir. Bu bolsa sungat eserini grafika meňzeş görkezýär. Şahyr Meňli atly gyza aşyk bolan ýaş şahyry suratlandyrypdyr.
«Magtymgulynyň watanynda» suratynda Muhammet Rejepgeldiýew Garrygalanyň dag jülgesinde gaýanyň beýikliginde oturan bürgüdi şekillendiripdir. Wepaly garawul ýaly ol ýiti gözlerini üns bilen ýodajykdan ýöräp barýan ýolagçylardan aýyrman seredýär. Şu ýodadan öňler Magtymgulynyň geçendigini ynam bilen aýtmak bolar. Belki-de ol onuň dolanmagyna garaşýandyr.
Magtymguly Pyragynyň zergärçilik bilen gyzyklanmasyny ýatlap üç sany zenan şaý-sepleriniň ekspozisiýasy boldy. Öz işlerini Aýjemal Çaryýewa, Göwher Nurymowa we Akgül Annasaparowa öz ogly Allaýar Batyrow bilen hödürlediler.
Dilber Umarowa her sergide diýen ýaly keramiki şekilleriň toplumyny hödürleýär, olaryň arasynda gelşikli şadyýan obadaşlar we ýagşy niýetli ýaşulular, hem-de küdürje guzular bar. Bu sergide hem «Oba durmuşy» işiniň gahrymanlary myhmanlaryň göwnüni göterdi.
Magtymguly Pyraga bagyşlanan sergi şahyryň dürli awtorlyk garaýyşlary bilen bir hatarda, türkmen suratkeşleriniň ussatlygyny görkezdi.
