Özbegistan Respublikasynyň Fergana şäherinde geçirilen guşakly göreş boýunça Aziýanyň çempionatynda türkmen türgenleri 9 medal gazandylar. Ýygyndy topardan ildeşlerimiz 3 sany altyn we 6 sany bürünç medala mynasyp boldylar.

15 döwletden 200-den gowrak türgeni jemlän guşakly göreşiň erkin usuly boýunça türkmen göreşijileri 3 sany altyn we 3 sany bürünç medala eýe boldylar. Çempionatyň altyn medallaryny Şatlyk Durdygulyýew (agram derejesi 68 kilograma çenli), Hekim Täşliýew (100 kilograma çenli), Annagurban Allaberdiýew (100 kilogramdan ýokary) gazandylar. Ýaryşda Pälwan Babajanow (57 kilograma çenli), Hekim Nurberdiýew (62 kilograma çenli), Myrat Janmämmedow bolsa (82 kilograma çenli) agram derejelerinde bürünç medal eýelediler.

Aziýa birinjiliginde bürünç medallara Hojanazar Annaýew (75 kilograma çenli), Batyr Hemraýew (82 kilograma çenli) we Hekim Täşliýew (100 kilograma çenli), eýe boldular. Şeýlelikde Hekim Täşliýew bu ýaryşda iki medala eýe boldy.

Biziň watandaşlarymyzyň Ferganada görkezen ajaýyp netijesi ýurdumyzyň guşakly göreş boýunça mekdepleriniň halkara sport meýdançasynda abraýynyň ýokarydygynyň nobatdaky subutnamasy boldy.