Aşgabat şäherindäki atçylyk sport toplumynyň açyk manežinde ýaş hem-de tejribeli çapyksuwarlary bir ýere jemlän konkur ýaryşlary geçirildi. Bäsleşige jemi 20 türgen: 9 sany ýaş çapyksuwar we 11 sany uly ýaşly ussat gatnaşdy. Geçirilen ýaryşlar dürli ýaş toparlaryna degişli gatnaşyjylara öz başarnyklaryny synagdan geçirmäge, taýýarlyk derejesini we atlar bilen sazlaşykly hereket etmek ukybyny görkezmäge mümkinçilik berdi.

Ýaryşyň maksatnamasy çylşyrymlylyk derejesi boýunça iki topara bölündi. Ilki bilen, ýaş türgenler meýdança çykyp, päsgelçilikleriň beýikligi 90, 100 we 110 santimetr bolan üç tapgyrdan geçdiler. Uly ýaşly çapyksuwarlar bolsa päsgelçilikleriň beýikligi 110, 120 we 130 santimetre deň bolan has çylşyrymly ugurlar boýunça bäsleşdiler.

Ýaryşyň netijeleri boýunça ýaş gatnaşyjylaryň arasynda Gudrat atly at bilen çykyş eden Ýewa Ragulina ýeňiji boldy. Alýur atly at bilen çykyş eden Gülnabat Paýtykowa ikinji orny eýeledi. Asuda Asman atly at bilen çykyş eden Medine Ahmedowa bolsa baýrakly orunlaryň üçlügini jemledi. Üç türgeniň hem ýokary ussatlyk görkezip, öz ugurlaryny ýekeje jerime utugyny hem almazdan tamamlandyklary aýratyn bellärliklidir.

Uly ýaşly çapyksuwarlaryň arasynda Gudrat atly at bilen çykyş eden Mergen Gurbanlyýew iň gowy netijäni görkezdi. Azançy atly at bilen çykyş eden Meret Haladow ikinji orna mynasyp boldy. Hanaý atly at bilen çykyş eden Oraz Sähetliýew bolsa üçünji orny eýeledi.